Тывада өөредилге инфраструктуразының комплекстиг чаартылгалары уламчылап турар. Регионнуң Баштыңы Владислав Ховалыгның даалгазы-биле чаа школалар тудуглары база өөредилге албан черлериниң капитал септелгелери-биле чергелештир, оларны амгы үениң дериг-херекселдери-биле дериир ажылдар база чоруп турар.
Чаа өөредилге чылында республиканың 97 өөредилге албан черлерин дериг-херекселдер-биле четчелээр. Ол ажылды амгы үениң негелделеринге дүүштүр өөредилге хүрээлеңин тургузарынче угланган «Аныяктар болгаш чаштар» национал төлевилелдиң «Шупту эки чүүлдү — уругларга» деп федералдыг төлевилелиниң иштинде чорудуп турар.
Кол кичээнгейни профильдиг кабинеттерниң дерилгезинче улгандырган. Амгы үениң дериг-херекселин физика болгаш технология, чурумалдыг уран чүүл болгаш хөгжүм кабинеттери алыр. Ол чүүл өөредилге чорудуун практика кырынга ажыглаарынга, школачыларның шинчилел ажылдарын чорударынга, төлевилел болгаш чогаадыкчы ажылдарны делгемчидеринге, ол ышкаш өөредилгениң шынарын бедидер арганы бээр.
Школаларның материал-техниктиг баазаларын чаартыры республиканың өөредилге адырының хөгжүлдезиниң талазы-биле системалыг ажылының кезээ бооп турар. Амгы үениң кабинеттери база дериг-херекселдер уругларга шынарлыг билигни алырынга, оларның салым-чаяанын илередиринге база хереглелдиг арга-мергежилдерни шиңгээдип алырынга таарымчалыг байдалды тургузар.
Ол ышкаш чоорту школа инфраструктуразын чаартыр ажылдар уламчылап турар — уруг бүрүзү чурттап турар чери хамаанчокка амгы үениң таарымчалыг байдалынга өөренир аргалыг болур. Бо чылын «Аныяктар болгаш уруглар» национал төлевилелдиң ачызында Туран хоорайда чаа школа туттунуп турар, ол ышкаш өөредилге албан черлеринде чаартылгалар болгаш капиталдыг септелгелер чоруп турар.
/ Бистиң корр.
Чурукту ТР-ниң Чазааның парлалга албанындан алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn