Тываның А.С. Пушкин аттыг национал ном саңының ажылдакчылары «Чылыг сөстүң одаа» бөлгүмүнүң ээлчеглиг ажылын «Аңгы-аңгы чоннарның чогаалдары тыва дылда» деп аттыг эрттирген. Бо удаада бөлгүмнүң ажылынга билдингир чогаалчы, Россияның Чогаалчылар эвилелиниң кежигүнү Ш.М. Суваң бодунуң бодалын илередип, номчукчуларның солун-сеткүүлдерге бижиир шүлүктериниң болгаш очулгаларның дугайында бодунуң көрүжүн илередип, барымдаалыг чижектерге даянып, бодалдарын үлешкен.
Шүлүкчү, очулдурукчу, тускай шериг операциязының киржикчизи Э.М. Манчин очулгага хамаарыштыр бодунуң «Чурт чаңгыс – салым чаңгыс» деп очулдурган номундан шүлүктерни аянныг номчаанын келген киржикчилер магадаан.
Филология эртемнериниң кандидады, Тываның гуманитарлыг болгаш социал-экономиктиг тускай шинчилелдер институдунуң башкарыкчы эртем ажылдакчызы Н.Ч. Серээдар «Чечен чогаалдарның очулгаларының дыл талазы-биле онзагайлары» деп солун илеткелди кылган.
Тываның болгаш Россияның Чогаалчылар эвилелиниң кежигүнү, уруглар эмчизи З.С. Серен-Чимит амыдыралда тыва, орус дылдарывысты канчаар, кандыг таварылгада ажыглай кааптарывысты боттуг чижектер берип, чугаалап бербишаан, килдиске бодунуң номнарын белек кылдыр берген.
Аныяк шүлүкчү, очулдурукчу, Тываның Чогаалчылар болгаш Россияның Журналистер эвилелдериниң кежигүнү Чечена Монгуш бодунуң номнарының очулгаларының дугайында чугаалавышаан, ол номнарының иштинде тыва, орус дылдарга шүлүктерин аянныг номчаан.
«Аңгы-аңгы чоннарның чогаалдары тыва дылда» деп делгелгеге А. Пушкинниң, М. Горькийниң, С. Есенинниң, Ч. Айтматовтуң, А. Грибоедовтуң болгаш өске-даа чогаалчыларның чогаалдарын делгээн.
/ Медээни «Тывамедиабөлүк» ИА-дан алган.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...