Гематоген ажыктыг бе?
Гематогенниң кол кезээ — буганың кургаткан ханы. Ол ышкаш ында чигир сировун, желатинни, хоюткан сүттү, ары чигирин, патоканы, витаминнер болгаш минералдарны холаан.
Ажыктыг шынары: железо чедишпезин хандырар (ол дээш ону чогааткан), ол ышкаш иммуннуг системаның ажылдаарын деткиир продукт база организмни ажыктыг бүдүмелдер-биле хандырар.
Шупту гематогеннер ажыктыг бе? Чок, бүдүрген черинден хамааржыр. Чамдык продуктуларда альбумин (хандан кылган порошок) безин чок болур. Ол чокта анаа-ла чигирзиг батончик болур.
Алое, капуста база крахмал
Эът-кеште көгерген черни канчаар дүрген чидирерил? Кемдээн черге чара кескен алое бүрүзүн салыр. Ол бичии көкке эки дузалаар. Алоени пластырь-биле быжыглап ап болур. А шала улуг көгерген балыгны капуста бүрүзү-биле эмнеп болур. Капуста бүрүзүн салыр мурнунда бичии чымчадыр соктап алыр.
Ол ышкаш крахмалды суг-биле митпейтир холааш, кемдээн черге чаар. Даартазында-ла гематоманың изи безин чок боор!
База бир арга — банан картының иштии талазын көгерген черге чартык шак тургузарга база дээштиг.
Гемоглобини чавыс кижилерге ажыктыг рецепт
Бир стакан грек тоорук үрүңү биле ол хире үзүмнү 1 литр банкаже кудар. Ийи ортумак лимонну сөөктеринден аштааш, эът тыртар машинага тырткаш, ооң кырынче немээр. Ары чигири (май айның болза оон-даа эки), бир-бир стакан морковь биле свекла чулуун кырынче немээш, шуптузун холуй былгаар. Ону соодукчуга шыгжаар. Хүнде 3 катап бир омааш иштин чиир.
Чурукту ГигаЧатка чуруткан.
“Шын” №14 2026 чылдың апрель 16