АЖЫЛ-ИШЧИ КҮС.

Башкызынга дузалашкан

Каа-Хем кожууннуң Сарыг-Септиң 2 дугаар ортумак ниити билиг школазының 7 «в» клазының өөреникчилери хоочун башкы Мария Шимитовна Оюннуң огородунда ногаа аймаан болгаш картофельди казып ажаап бергеннер.

Оолдар, уруглар хөглүг болгаш демниг ажылдааш, хоочуннуң огородунда дүжүттү каскаш, кургаткаш, шыгжаарынга белеткеп кааннар. Огородтуң девискээринде ногаа болгаш картофель сыптарындан аштап-арыглаан.

Мария Шимитовна бежен бир чыл дургузунда башкылап ажылдааш, аныяк-өскенни өөредип-кижизидеринге улуг үлүүн киирген. Ооң өөреникчилери чораан кижилерниң ажы-төлүнүң ажы-төлү амгы үеде Сарыг-Септиң 2 дугаар школазында амгы үеде өөренип турар.
7 «в» класстың өөреникчилери болгаш бо класстың удуртукчу башкызы Лариса Бодаевнага улуу-биле өөрүп четтиргенин Мария Шимитовна сеткилиниң ханызындан илереткен.

Дүжүттү ажаап алган

Дүрген суурнуң бажың-интернадының ажылдакчылары болгаш кадыының байдалы эки, ында чурттап турар хоочуннар бо албан чериниң дузалал ажыл-агыйынга ногааны болгаш картофельди чылдың-на тарып өстүрүп келгеннер.

Кадыының болгаш хар-назынының байдалының аайы-биле бажың-интернатта чурттап турар кижилерге чылыг үеде ногаа тарып өстүреринге боттарының шаа-биле киржири – оларның кадыынга эки салдарлыг.

Сентябрь айның ортаа үезиниң кааң хүннеринде олар боттарының тарып өстүрген ногаазының болгаш картофелиниң дүжүдүн казып алгаш, кургадып арыглааш, шыгжаарынга белеткээн. Бо күскү дүжүт келир кышкы үеде Каа-Хем кожууннуң Дүрген интернат-бажыңының чурттакчыларынга экологтуг арыг шынарлыг, витаминнер-биле байлак чем болур.

“Шынның” корр.