Росхереглелхайгааралдың демдеглеп турары-биле, ОРВИ болгаш грипптен аарып турар улустуң саны хүнден хүнче өзүп эгелээн. Сөөлгү ийи неделя дургузунда өзүлдениң шапкыны 28 хуу четкен. Россияның 31 субъектилеринде грипптен хөй кижи аарып турар болза, коронавирустуң чаа хевиринден аарып турар улус 71 субъектилерде демдеглеттинген.
Эксперттерниң бодалы-биле, бир эвес Тываның чурттакчылары ам-даа гриппке удур тарыдып албаан болза, халдавырлыг аарыг өөскүвээнде тарыдып алыры чугула. Амгы үеде регионда гриппке удур 181043 кижи тарыдып алган, вакцинация планының күүселдези 90,9 хуу четкен.
Росхереглелхайгааралдың Тывада эргелелиниң медээзи-биле, Кызылда 367 кижи ОРВИ-ден аараан, эрткен неделяга деңнээрге, 46,2 хуу көвүдээн болуп турар.
Ынчангаш бо халдавырлыг аарыглардан камгаланыр дизе, дарый тарыдып алыры чугула. Уругларга, иштиг-сааттыг херээжен чонга, улуг назылыгларга, хоочураан аарыглыг улуска, малчыннарга, эмнелге, садыг-саарылга, өөредилге албан черлериниң болгаш чуртталга-коммунал ажыл-агыйының ажылдакчыларынга халас тарылганы чорудуп турар.
Ол ышкаш кижи бүрүзү арыг-шеверниң бөдүүн негелделери – үнгеш-киргеш, холун саваңнап чуур, хөй чон чыылган черге камгалал масканы доктаамал кедер, ажылдап олурар кабинеттерин өйлеп-өйлеп агаарладыр болгаш аштап-чуур, телефон, компьютер, планшеттерни доктаамал чүлгүп турар болза, бо халдавырлыг аарыглардан аарывайн барып болур дээрзин билзе чогуур.
Сорунза Монгуш белеткээн.
Чурукту интернеттен алган.