ҮШ АК
Аныяк кижиниң дижи ак,
Кырган кижиниң бажы ак,
Өлген кижиниң сөөгү ак.
ҮШ КӨК
Тайга бажында меңги көк,
Шынаа черде суг көк,
Өрү көөрге, дээр көк.
ҮШ САГЫЛГА
Чаш төлге эргелел-кээргел херек,
Кырганнарга эвилең сеткил херек,
Өлгеннерге хүндүткел ёзулал херек.
ҮШ БЕРГЕ
Дөш куду хаван сүрери берге,
Кыдыы көзүлбес хову кежери берге,
Дүмбей дүне сылдыс санаары берге.
ҮШ ТААЛАЛ
Аът мунгаш, бир таалаар,
Эзер-чүгенге чедингеш, бир таалаар,
Кадайлангаш, бир таалаар.
ҮШ БАК
Бак ыт – аал чуду,
Бак эзер – аът чуду,
Бак кадай – ашак чуду.
ҮШ МЕЛЕГЕЙ
Анаа мелегей аъдын мактаар,
Ёзулуг мелегей кадайын мактаар,
Тулган мелегей бодун мактаар.
ДЫШ КӨРБЕС ҮШ ЧҮҮЛ
Хопчу кадайның дылы дыш чок,
Ыяш чүктээр — оорга дыш чок.
Кадарчының сагыжы дыш чок.
Чурукту интернеттен алган.
“Шын” №92 2023 чылдың декабрь 2