Аас-кежик кайдал?

Шаг шаанда кажан Бурган черни, ыяштарны, аң-меңни болгаш кижилерни чаяап турар үеде болган чүве-дир. Бо бүгүнүң тергиидекчизи кижи болу берген. Кажан ону Шамбала оранындан үндүр сывырып эгелээрге, ол аңнардан аңаа аас-кежикти тып бээрин дилээн. Кижиге чагыртып өөренген аңнар өртемчейден кижиниң аас-кежиин дилеп чоруп кааннар.

Дыка үр дилээш, кижиниң аас-кежиин тыппааннар. Ооң канчаар көстүрүн безин билбес болганнар. Ынчангаш олар боттарын аас-кежиктиг болдуруп турар чүүлдерин эккеп бээр деп шиитпирлээннер. Балык чакпаларын, кудуруун, танаан болгаш казырыын эккеп берген. Пар — күштүг даваннарын, дыргактарын база азыг диштерин. Эзир — чалгыннарын, чүглерин, сүүр думчуун болгаш көскү караан. Ол бүгү кижини аас-кежиктиг болдурбаан. Ынчан аңнар аас-кежиин боду тып алырын кижиге сүмелээн.

Оон бээр кижи бүрүзү чер кырында бодунуң аас-кежиин дилеп чоруур апарган. Аас-кежик бодунда деп чүүлдү эвээш-ле кижилер угаап чоруур.

“Шын” №64 2024 чылдың август 24