Тускай шериг операциязының хоочуну бодунуң хууда херээн ажыдып алгаш, бичии чаштарга ачы-буянны чедирип турар. Меңги Хомушку ТШО-га киришкеш, төрээн Кызыл-Мажалыынче онча-менди чанып келген. Ол 4 ажы-төлүнүң үлегерлиг адазы болурундан аңгыда, арга-дуржулгалыг парикмахер. ТШО соонда дайынчының үзел-бодалы өскерилген, сорулгалары база делгем апарган. Ол социал керээ программазынга киришкеш, парикмахерская ажыдып алыр аргалыг болган. Бедик дуржулгалыг парикмахерге хуу ажыл-херээн ажыдып алырынга күрүне программазының деткимчези улуг дөгүм болган.
Меңги Хомушкунуң парикмахерскаязы чаа-ла ийи неделя ажылдап турар. Ол бир-ле дугаар ээлчегде өг-бүлелерге болгаш ажы-төлге социал дуза чедирер төп-биле харылзашкаш, бичии чаштарның чажын халас таарып эгелээн.
ТШО киржикчилеринге хууда ажыл-херээн ажыдып алырынга күрүне деткимчени берип турар. Бо чылдың февраль 20-де база улуг комиссия эрттирилгези болур. Аңаа ажылдап кылган төлевилелдиг дайынчылар документилерин тус черниң чурттакчы чонну ажылга хаара тудар төптеринге дужаагаш, мөөрейге киржип болур. Шилип алган угланыышкыны ёзугаар 350 муң азы 200 муң акша деткимчени алыр аргазы бар. Республика комиссиязынга чүгле муниципалдыг чаданы чедиишкинниг эрткен кижилер киржип болур.
2024 чылдың октябрь 3-те Ада-чурт камгалакчыларының фондузунга бир дугаар ТШО хоочуннарының болгаш чоок кижилериниң аразынга социал керээ программазының комиссиязы болуп эрткен. 34 кижи боттарының төлевилелдерин камгалап алган. Бо хүнде оларның чамдыктары көдээ ажыл-агый адырында хөгжүп турар, өскелери аар чүък сөөртүлгезин чорудуп, кафе, парикмахерскаялар болгаш садыглар ажыдып алгаш, амыдыралын шуудадып эгелээн.
Бистиң корр.
Чурукту Ада-чурт камгалакчыларының фондузундан алган.
“Шын” №5 2025 чылдың февраль 13