Ачы-дуза чедирилгези эгелээн.

Тываның Баштыңы Владислав Ховалыгның ачы-дуза чедирер дээн кыйгырыын кожуун-сумулар деңнелинде идепкейлии-биле хүлээп алган. Оларның бирээзи - Улуг-Хем кожуун.

Кожуун чагыргазының даргазы Буян Балбак долу эвес мобилизацияже кыйгырткан чаңгыс чер-чурттугларынга, оларның өг-бүлелеринге ачы-дуза чедирериниң баштайгы базымнарын эгелээнин дыңнаткан:

"Чазак Даргазының даалгазы езугаар бо хүн кыйгыртыышкынга таварышкан 2 чаңгыс чер-чурттугларывыстың өг-бүлелеринге дуза кадары-биле каа-хем хөмүр-дажын бир-бир тоннаны дүжүрүп бердивис. Олар чер бажыңнарда чурттап турарлар. Бирээзи 2 ажы-төлдүг, өскези - үш. Бо кежээ азы даарта база 4 өг-бүлеге хөмүр-дашты чедирип бээр бис. Оон аңгыда оттулар ыяш-биле база дузалажыр бис - деп, Буян Балбак чугаалаан. - Чаңгыс чер-чурттугларывыска дарый дүрген дуза чедирерин кызыттывыс. Ам бо үеде Шагаан-Арыгда база кожууннуң шупту суурларында ачы-дуза негеттинип турар өг-бүлелерниң даңзызын тургузуп тур бис. Даарта даңзы белен болур, ынчангаш ачы-дуза чедирер ажыл эгелээр: картофель, аъш-чем аймаа, бир шоодай далган биле бир баш хойну ук өг-бүлелерге чедирип бээр бис. Ачы-дузаны республиканың болгаш кожууннарның чагыргаларының курлавырларындан үндүрүп берип турарывыс ол. Ооң-биле кады мал-маганынга сиген-ширбиилди эвээш белеткээн улуска база дузалажыр бис".