Тываның Чурагайлыг хөгжүлде яамызы «Чурагайлыг күрүне эргелеп-башкарылгазы» федералдыг төлевилелдиң күүселдези-биле социал ужур-дузалыг 92 ачы-дузаны электроннуг хевирже шилчидерин чедип алган. Бөгүн социал ужур-уткалыг ачы-дуза алыры-биле, регионнуң күрүне эрге-чагырга органнарынче болгаш тус чер чагыргаларынче кирген шупту дилеглерниң 99,6 хуузу Күрүне ачы-дузаларының чаңгыс аай порталы таварыштыр кирген.
Оон аңгыда ажыглакчылар аразынга эрттирген шинчилелдер регионнуң ачы-дуза чедирилгезиниң шынарынга таарзынган тускай көргүзүглер чедип алдынганын көргүскен, 4,5 баллдан өрү демдекти 41,94 хуу чедирери 53 хуу болган. Онлайн-дилеглерни сайгарганының шынары-биле алырга, хамаатыларның эки үнелелин 51 хуу чедирер планны 99,6 хууга кылган.
Амгы үеде ведомство күрүнениң тудуг хайгааралының база автоматчыткан чуртталга хайгааралының чурагайлыг системазын ажыглалче кииреринге белеткенип турарын Чурагайлыг хөгжүлде яамызы дыңнаткан. 2025 чылдың август 30-ге чедир ону ажылдадыры планнаттынган.
«Бо шиитпирлерни ажыглалче киирери хыналда-дүүштүрүлге чорудуун автоматчыдар арганы бээр» – деп, программа тургузукчузунуң бирээзи Тываның Чурагайлыг хөгжүлде яамызының чурагайлыг эде тургузуушкун килдизиниң начальниги Сайдаш Херлиг-оол чугаалаан.
Республиканың чурттакчыларынга чаа чурагайлыг ачы-дузаларны ажыглалче киирери боттарының үезин камнап, контроль болгаш хайгаарал ажыл-чорудулгазының ажык-чарлыын хандырар.
«Чурагайлыг күрүне эргелеп-башкарылгазы» федералдыг төлевилел «Медээлер экономиказы болгаш чурагайлыг эде тургустунуушкун» национал төлевилелдиң кезээнче кирип турар. Ооң кол сорулгазы – күрүне болгаш муниципалдыг эрге-чагырганың, экономиканың болгаш социал адырның чурагайлыг эде тургузуушкунун чедип алыр. Төлевилел күрүне эргелеп-башкарылгазынга чурагайлыг технологияларны болгаш чаңгыс аай шиитпирлерни ажыглалче киирип, хамаатыларга болгаш бизнеске деткимчени көргүзүп, электроннуг документилерниң удур-дедир солчулгазын сайзырадыр.
Бистиң корр.
“Шын” № 30 2025 чылдың август 7