Февраль 22-де Тываның В.Көк-оол аттыг Национал хөгжүм-шии театрынга Ада-чурт камгалакчыларының хүнүнге тураскааткан байырлыг хемчег болган. Аңаа Тываның күүсекчи болгаш эрге-хоойлу структураларының органнарындан төлээлер, 55-ки гвардейжи бригаданың шериг албан-хүлээлгелиглери, удуртукчулары, хөй-ниити организацияларындан төлээлер дээш өскелер-даа кээп киришкен.
Тускай шериг операциязының эгелээн чылындан тура бо байырлалдың утказы улам күштелип, Россияның төөгүзүнде ада-чуртун камгалап чораан маадырларның кылган херээн, тиилелгелерин амгы үеде ТШО-нуң маадырлары уламчылап турары-биле шериг-патриотчу утка-шынары дам барган.
Байырлыг хемчег эгелээр мурнунда ТР-ниң Чазак Даргазы сөс ап байыр чедирген:
– Ада-чурт камгалалының хүнү Россияның аңгы-аңгы салгалдарын харылзаштырып турар. Бо хүнде бис эрес-дидим чоруктуң кичээлдерин эрттирип, шынныг төөгүнү тайылбырлап, Ада-чурттуң Улуг дайынының маадырларынга, тыва эки турачыларга мөгейип, тиилелгени чоокшуладыр дээш бүгү күжүн харамнанмайн туржуп чорааннарның тураскаалдыг чырык адын сактып ханы хүндүткелди илередир бис.
Бо хүннерде бистиң шуптувустуң чүректеривис ТШО-да киржип турар дайынчыларывыс-биле кады. Эң-не берге тулчуушкуннарга таваржып-даа турза, бистиң чырык келир үевис дээш олар эрес-дидим чоруун көргүзүп, тулчуп турарлар. Авдеевканы хостажырынга тулчуушкуннуң мурнуку одуруунга 55-ки гвардейжи даг-адыгжы бригаданың дайынчылары чоруп турганы дээш чоргаарланмас аргавыс чок! Бүгү делегей бистиң экер-эрес дайынчыларывыстың Авдеевкага Тываның тугун киискидипкенин көрген.
Хүндүлүг чаңгыс чер чурттугларым! Изиг адыш часкаашкыннары-биле бүгү тыва чоннуң мурнундан Россияның Маадыры, РФ-тиң камгалал сайыды Сергей Шойгуга, Авдеевканы хостаарынга дайынчыларны мөөңнеп турган командылакчы генерал-полковник Андрей Мордвичевке, 55-ки гвардейжи даг-адыгжы бригаданың командири полковник Сергей Карасевка болгаш ТШО-да бүгү шериг кезектеринде киржип турар дайынчыларга, Тывадан барган дайынчыларга бо ТИИЛЕЛГЕ дээш изиг байыр чедирерин чөпшээреп көрүңер! – дээш Чазак Даргазы тускай шериг операциязының үезинде эрес-дидим чоруу дээш ТШО киржикчилеринге ТР-ниң Чазак Даргазының өөрүп четтириишкин бижиктерин болгаш хүндүлел бижиктерни тывыскан. Ол ышкаш “Тиилелге хүнү” деп медаль-биле дайынчылар шаңнаткан. Тываның чонунуң мурнундан чыгган ачы-дуза чүъгүн коргуш чок ТШО-га сөөртүп чедирип берип турган чолаачы Аймир Номчулага 127-ги даг-адыгжы дивизияның командириниң мурнундан Өөрүп четтириишкин бижиин тывыскан.
Байырлыг хемчегни шериг-патриотчу хөөн сиңген “Тыва сүлде” деп Тываның Национал “Саян”сам болгаш ыры театрының артистериниң кончуг солун концерт программазы уламчылаан. Номер бүрүзү, сцена кырында чугаалап турар сөс бүрүзү, сам бүрүзү чүректерже өрүмнеп кире бээр кылдыр бедик профессионал деңнелге тургускан программаны чыылганнар магадап көрген.
К. МОНГУШ.
Чиңгис СААЯНЫҢ тырттыргаан чуруктары.
"Шын" №14 2024 чылдың февраль 24