Салым-чолу чурттуң маадырлыг төөгүзүнүң кезээ апарган кижи — Ада-чурттуң Улуг дайынының хоочуну Георгий Васильевич Абросимов 100 харлаан юбилейин демдеглеп турар. Республиканың Баштыңы Владислав Ховалыг фронтучунуң 100 харлааны-биле байырны чедирип, Тываның чоргааралы хоочуннуң Тиилелгеге болгаш республиканың хөгжүлдезинге ооң киириштирген улуг үлүг-хуузун демдеглээн.
17 харлыг оолчук Георгий Абросимовту Кызыл Шеригниң одуруунче кыйгырткан Георгий Васильевич 3-кү Белоруссия фронтузунуң составы-биле 1944 чылдың августа Калининград облазын хосташкан. 1945 чылдың январьда гвардияның сержантызы Г.Абросимов аар балыглангаш, үрде манаан Тиилелгени госпитальга уткаан.
«Ооң амыдыралы – эрес-дидим чоруктуң болгаш тура-соруктуң үлегер-чижээ. 1943 чылдың декабрьда чалыы үезинде Кызыл Шеригниң одуруунче кыйгырткан турган. Амыр-тайбың келир үевис дээш аар-берге фронт оруун эрткени – ооң төөгүзү» - деп, Тываның Баштыңы демдеглээн.
Хоочуннуң Ада-чурт мурнунга онзагай ачы-хавыяазын база республиканың хөгжүлдезинге киирген үлүг-хуузун барымдаалап, юбилярга регионнуң эң бедик күрүне шаңналы — «Тыва Республика орденин» тыпсыр дугайында саналды деткээнин регионнуң удуртукчузу дыңнаткан. Ол Георгий Васильевичиге ооң маадырлыг чоруу дээш сеткилиниң ханызындан өөрүп четтиргенин илереткеш, быжыг кадыкшылды, чоок кижилериниң чылыг-чымчак хамаарылгазын болгаш сагыш човаашкынын күзээн.
Георгий Васильевич Абросимов 1926 чылда төрүттүнген. Ооң аныяк үези Ада-чурттуң Улуг дайынының чылдарында эрткен. Шеригже кыйгырткан соонда, 3 дугаар Белоруссия фронтузунуң составы-биле Мурнуу Пруссияны хостаарынга киришкен дайынчы орукту эрткен. 1945 чылдың январь айда аар балыглангаш, эмнелгеже чорудуптарга, аңаа Тиилелге хүнүн уткаан. Эрес-дидим база маадырлыг чоруун көргүскени дээш, «Германияны тиилээни дээш», «Дайынчы ачы-хавыяа дээш» дайынчы орденнер болгаш медальдар-биле шаңнаткан.
Хоочун дайын соонуң чылдарында тайбың амыдыралче эглип келгеш, Тываның хөгжүлдезинге улуг үлүг-хуузун киирип, шалыпчы ажылдап, чаңгыс чер чурттугларының хүндүткелин чаалап алган. Георгий Васильевичиниң юбилейи – бүгү республикага улуг төөгүлүг болуушкун, чурттуң амыр-тайбың келир үезин быжыг туруштуг болгаш бердинген чоруу-биле хандырган тиилекчилерниң салгалынга өөрүп четтиргенин илередир онзагай чылдагаан болур.