Эрзин суурнуӊ Соян Чакар аттыг ортумак школазы Ада-чурттуӊ камгалакчызы эрес-дидим маадыр Ай-Белек Шининниӊ чырык адынга тураскааткан ыры-хөгжүм мөөрейин эрттирген.
Өзүп олурар салгалдарга патриотчу-кижизидикчи сорулгалыг «Хорлар демисели» деп мөөрейге ийиги класстан эгелээш, улуг класстарга чедир киржип турган. Школачылар бедик утка-шынарлыг ырыларны күүседип, чараш танцы-самны бараалгадып көргүскен. Маадырга тураскааткан мөөрейге 5 «Б» класс тиилээн.
Эрзин суурнуӊ школазыныӊ доозукчузу Ай-Белек Шинин тускай шериг операциязынга шериг хүлээлгезин күүседип тургаш, 2023 чылдыӊ октябрьда маадырлыы-биле мөчээн. Россия Федерациязыныӊ Президентизиниӊ Чарлыы-биле «Эрес-дидим чоруу дээш» орденни мөчээн соонда тывыскан.
Ортумак школада «Кызыгааржыныӊ аныяк өӊнүктери» деп шериг-патриотчу бөлгүмнү Цаган-Тологойда кызыгаар заставазыныӊ удуртулгазы-биле эрттирип турар. Аңаа шериг кижиниӊ ат-алдарын, хеп-сынын төлептиг эдилээр, шериг албан хүлээлгезин ыяк күүседир деп билиглерни база өөредир. Ай-Белек Шинин ол бөлгүмге барып турган, а баштайгы даӊгыраан чеди класска тургаш берген.
Ооӊ өөренип турган клазы чылдыӊ-на Кызыгааржылар хүнүнде заставада солдаттарга байыр чедирип, концерт көргүзер. Улуг чурттуӊ кызыгаарын канчаар камгалаарын, дүрүмнү сагыырын, ок-чепсекти шын ажыглаарын өөренип, солдат кижиниӊ аъш-чемин, кашазын-даа чип турганнар. Бир катап оолдарга аът кажаазы аштаар деп даалга берген. Ай-Белек кадыг-берге ажыл кылырындан чалданмас болгаш, хамыкты мурнай чүткээн. Оон баргаш, кажааны чай кадында аштап каапкан. Бичии оолак хирезинде, чыскаалган санында-ла: «Служу Отечеству!» деп ёзулаарын ооӊ башкылары, эш-өөрү сактып чоруур.
Ол шериг херээн болгаш уран чүүлдү дыка сонуургап чораан. «Өлчей-кежик» деп танцы-сам коллективиниӊ баштайгы солизи турган. Школаны доозуп алгаш, шериг хүлээлгезин эрттирген соонда, Железногорск хоорайга, Чечен Республикага ажылдап турган. Төрээн чуртунга бердинген болгаш, камгалакчыларныӊ одуруунче шиитпирлии-биле кирип алган.
РФ-тиӊ Кургаг чер шериглериниӊ 55-ки гвардейжи даг-адыгжы бригадазыныӊ гвардейжи биче сержантызы Ай-Белек Александровичиниӊ биче сеткилдиг, дузааргак бүдүжүн улус эскерип, магадаан.
Тываныӊ Камбы-лама эргелиниӊ Цеченлиг хүрээзинге үргүлчү баар. Хостуг үези бар болза, «Чүнү кылыйн, дузалажып болур мен» деп айтырып чедер. Кылыр ажыл бар болза кылчып бээр. Ындыг чүве чок болза, хүрээниӊ шалазын-даа чуп кааптар. Дуза дилээрге, черле чажам дивес, албан дузалаар.
Биче сеткилдиг, угаангыр-сагынгыр болгаш эрес-дидим дайынчы ТШО-га кадыг-дошкун демисел үезинде мөчээн.
Чуртун камгалаар ыдыктыг хүлээлгезин төлептиг күүседип чоруур шериглер кезээде уттундурбас дээрзин «Ада-чурт камгалакчыларыныӊ» фондузунуӊ регионалдыг салбыры, «Маадырларга мөӊге алдар» хөй-ниити организациязы медеглеп турар.
Р. ДЕМЧИК белеткээн.
Чуруктарны интернеттен алган.
“Шын” №98 2024 чылдың декабрь 21