Ада-иелерге сагындырыг

Тываның Өөредилге яамызының дыңнатканы-биле, республиканың өөредилге албан черлеринге Чаа чылга хамаарышкан хемчеглер декабрь 22-ден 28-ке чедир эрткен турар ужурлуг. Өөреникчилерниң кышкы дыштанылгазы декабрь 30-ден эгелээш тос хонук дургузунда уламчылаар. Январь 9-та бүгү республиканың школачылары өөредилгезин эгелээр.

Республиканың школачыларынга ийи чылдың дургузунда Чаа чыл байырлалы чогумчалыг байдалга болбайн турган. Өөреникчилер ам-на улуг хемчегде белеткенип, Чаа чылды четтикпейн манап турар.
«Бо чоокку үш чыл дургузунда школаларга Чаа чылга хамаарышкан хемчеглер болбайн, чүгле онлайн хевирге байырлап турдувус. Ниитизи-биле алырга, белеткел ажылдарынга улуг-даа, бичии-даа улус сонуургал-биле киржип турар. Бичии уруглар шиви каастаар кылаң ойнаарактарын күзелдии-биле эккеп эгелээн» — деп, Кызылдың 17 дугаар школазының директорунуң оралакчызы Елена ЛОПСАН демдеглээн.

ТР-ниң өөредилге сайыдының бирги оралакчызы Орлан Соян:
– Чаа чыл байырлалдары болган соонда, өөреникчилерниң кышкы дыштанылгазы эгелээр. Дыштанылга үезинде ажы-төлдүң айыыл чок чоруун башкылар-даа, ада-иелер-даа кичээнгейге алыр ужурлуг бис. Башкылар боттарының өөреникчилериниң кандыг байдалда чурттап турарын, өг-бүлезин дыка эки билир. Ынчангаш дыштанылга үезинде өөреникчилер болгаш ада-иелер-биле сырый харылзаалыг ажылдаары башкыларның планында көрдүнген. Башкы бүрүзү ону билир. Күрүне шылгалдалары дужаар доозукчулар болгаш олимпиадаларга киржир уруглар дыштанылга үезинде белеткелин уламчылаар. Бир эвес агаарның температуразы соок болза, интернет четкизин таварыштыр өөренир аргалар бар.

Дыштанылга үезинде харыысалгалыг болурун, ажы-төлү-биле ырак-узак оруктарже үнмезин, аай-дедир чорук кылырын шегледирин, бажыңнарынга өг-бүлези-биле солун болгаш ажыктыг үени эрттирерин ада-иелерге күзедивис. Чаш ажы-төлдү хайгааралга ап, ада-иениң харыысалгазын күштелдирерин диледивис.