Он ийи харлыг тыва оол Индияда 2 чыл өөренип турар. Ада-иезиниң чанында эвес, долгандыр өске кижилер-биле. Боду-ла башкартына берген, кежээ удуп чыдып алгаш, эртежик боду-ла тура халып кээр. Аъш-чемни боду кылып чиир, өөредилгези база эки, багай өөренир болза үндүрүптер. Ында кымны-даа «өөрен!» деп албадавас, шупту ажылды боду кылыр, дыка кызымаккай.
Мээң сүмем болза, мында өөреникчилер база эки боданып, бодуңарны ол оолдуң орнунга солуп көрүңерем, кандыг-дыр? Өске чуртта, өске кижилер аразында, байдал шупту аңгы, мынчаар кызымак чоруур болзуңарза, силерге кандыг-даа хомудал, муңгарал турбас ужурлуг.
Оон ыңай, бис чүге төрүттүнген бис? Билдингир-ле-дир, чурттаар дээш. Чуртталгада эң-не улуг, кол күзел-сорук чүл? Эки чурттаары. Экини бодаарга, чугаалаарга, кылырга, бодунга эки деп билип турар болза, ол эң-не угаанныг кижи-дир. Ава-ачазы амыдырал-чуртталгага өөреткен-дир, ону хүн бүрүде күүседир, ава-ачазын өөртүр, амырадыр болза эки. Меңээ эртем-билиг херек дээш, эки кызып өөренир ужурлуг, амыдыралга акша херек дээш, эки ажылдаар, кижи бүрүзүнге быжыг кадыкшыл херек дээш, кадыын камнаар, меңээ эки ат херек дээш (шынчы, харыысалгалыг, идегелдиг, бүзүрелдиг), адын эки эдилээр, мен өг-бүлем-биле аас-кежиктиг болуйн дээш, чүгле найыралдыг болур, ажы-төлүмге үлегер-чижек болуйн дээш, эки ава-ачазы болур, бо бүгү билдингир, ам чүгле күүседир, база катап күүседир!
Даштын шалбааны оюп турар дээрге, мерген угаан-дыр, ол-ла ышкаш амыдыралдың «шалбаазын» оюп турган болза, дыка-ла эки ийик, шагдаалар көргеш, чурумнуг апаар бис, бодувус бодувуска шагдаа болуп, чурумнуг апаар болза, дыка-ла эки ийик. Эмчилерге барганда, кадык апаар мен деп бүзүрел улуг, боттарывыс кадыывысты үревес болза, дыка-ла эки чүве ийик, ЧҮГЕ бодувуска хора чедирер бис? — оон өскелерни буруудадыр. Ындыг болбас болза эки!!!
Силерниң Буян башкы.