Аэропортка бедик технологиялыг система кылыр

Кызылдыӊ аэропортунда күрүне кызыгаарыныӊ эрттирилге пунктузунуӊ техниктиг дерилгезин Роскызыгаар тудуг албан чери кылып турар.

Россия Федерациязыныӊ күрүне кызыгаарын таварыштыр ужуп эртер чүък-пассажир транспортунуӊ эрттирилге пунктузунуӊ техниктиг дерилгезиниӊ талазы-биле тудуг-монтаж ажылдары эгелей берген.

Сорулгалыг акша-хөреӊгини федералдыг бюджеттен үндүрген. Россияныӊ Транспорт яамызыныӊ эргелелинге хамааржыр Роскызыгаар тудуг албан чериниӊ чагыы ёзугаар төлевилелди боттандырып турар.

Делегей чергелиг аэропорттуӊ терминалынга, тодаргайлаарга, бир-ийи дугаар каъдынга кызыгаар, каайлы албаннарыныӊ, күрүнениӊ талазындан хыналда чорудар эдилел-херекселдерин дериир ужурлуг.

Паспорт хынаар беш кабинаныӊ бирээзин кадыыныӊ байдалы кызыгаарлыг улуска таарыштыр кылыр. Кызыгаар болгаш каайлы хыналдазынга бедик технологияларлыг система кожар. Амгы үениӊ техниктиг дериг-херекселдери-биле хыналда чорудар. Эрттирилге пунктузу бир шакта 100 пассажирни хынаар.

Техниктиг дерилге кожар талазы-биле төлевилелдиӊ ажылдарын 2023 чылдыӊ төнчүзүнде доозар деп турар.

Кызылдыӊ аэропортунга чурттар аразынга ужудар рейстерниӊ шупту болур-чогуур байдалдарын тургузуптарга, регионну сонуургап кээр туристер немежир, а Тыва немей инвестиция киирип ап болур.

«Росгранстрой» деп албан чериниӊ медээзи-биле Р. Демчик белеткээн.