Бистиң эгээртинмес улуг чуртувуска Өг-бүле чылында Тываның күрүне университединде Агбай-оолдарның студент ɵг-бүлезиниң дугайында чугаалаксадывыс. Бо чүүлдүң маадырлары – ТывКУ-нуң сургуулдары Алдар Аясович биле Аңгыр-Чечек Васильевна Агбай-оолдар.
Алдар Агбай-оол инженер-техниктиг факультеттиң доозукчузу, а Аңгыр-Чечек «тɵрээн дыл болгаш чогаал» база «англи дыл» деп 2 профильдиг башкы угланыышкынының 2-ги курузунуң студентизи. Олар иелээн хɵй-ниити ажылынга идепкейжи, факультеттиң болгаш университеттиң бүгү-ле культура-массалыг хемчеглериниң киржикчилери.
Аңгыр-Чечек биле Алдар кады 5 чыл чурттааннар. Школачы чылдарында кижи чүгле ёзулуг эштерни тып алыр эвес, а чамдыкта ёзулуг шынчы ынакшылынга дужа бээр. Алдар биле Аңгыр-Чечек база кады чурттаар салымныг болганнар. Оларның школачы найыралы быжыг, ынаныштыг, аас-кежиктиг ɵг-бүлеже шилчий берген.
«Техникумну дооскаш, ɵɵм ээзи-биле ТывКУ-же ɵɵренип кирип алган бис. Ѳɵренип тургаш, чаптанчыг кыстыг болдувус. Кыстыг болганывыска дыка ɵɵрүп чоруур бис. Шылгалдалар үезинде бот-боттарывыска дузалажып, чаш уруувусту элчип-селчип ап тургаш, кызып өөренип, бергелерни ажып эртип турар бис. Өɵм ээзиниң идепкейлиг, харыысалгалыг болгаш сагыш човангыр болганынга чоргаарланыр мен» — деп, Аңгыр-Чечек чоргаарланып чугаалаар.
Аныяк ɵг-бүлениң санап турары-биле алырга, аас-кежиктиг ɵг-бүлениң дɵзү — бот-боттарынга хүндүткел болгаш дыңнажып билиринде.
Буяна ЧАШ-ООЛ, филология факультединиң 2-ги курузунуң студентизи.
“Шын” №27 2024 чылдың апрель 10