Кызылда Аныяктар ордузунда шөлге “Агродиктант-2026” Бүгү-российжи хемчег болуп эрткен.
Ооң бир сорулгазы – көдээ ажыл-агыйже кижилерни, эң ылаңгыя аныяктарны хаара тудары. “Чаңгыс демниг Россия” политиктиг партияның болгаш “Росскөдээбанкының”, РФ-тиң Көдээ ажыл-агый яамызының деткиишкини-биле боттандырып турар “Российжи шөл” деп төлевилелдиң угланыышкыны-биле “Агродиктант” хемчегни чорудуп турган.
Агродиктантының сөзүглели 30 айтырыгдан тургустунган, ол айтырыгларга агродиктант акциязының киржикчизи дөртен минута дургузунда шын харыылаар ужурлуг. “Айтырыг – харыы” тестини ажыдарының мурнунда республиканың көдээ ажыл-агый сайыды Юрий Оруспай диктантыга киржилге көдээ ажыл-агыйның амгы технологияларының, чаа машина-техника дугайында билип алырынга дузалаарын демдеглээн.
Бо хемчегге чаңгыс эвес удаа киришкеннер бар болган. Эрес-оол Дотпаа агродиктантыга эрткен 2025 чылда база киришкен. Ынчан агродиктантының айтырыгларынга харыылаары белен эвес болганын ол билип алгаш, бо чылда албан киржир дээш белеткенип турганын дыңнаткан. Эрес-оол бо чылгы диктантының айтырыгларынга улуг бергедээшкиннер чокка харыылаан.
“Агродиктант” акциязының киржикчилериниң аразында аңгы-аңгы эртем-билиглиг, ажылдыг, албан-дужаалдыг кижилер бар болган. Тускай шериг операциязының киржикчизи, Россияның Маадыры, “Тываның маадырлары” кадрлар программазының киржикчизи, Аныяктар херектериниң талазы-биле сайыт Буян Куулар бо хемчегге киржип турарларның аразында аныяк оолдар, уруглар хөй болганын сеткили ханып демдеглээн. Оларның агродиктантыга киржилгези көдээ ажыл-агый адырында аныяктарның эвээш эвезин, Тываның экономиказының кол адыры көдээ ажыл-агыйны улам хөгжүдер салгалдар барын бадыткап турарын Буян Куулар чугаалаан.
Ш. МОНГУШ белеткээн.
Чуруктарны Көдээ ажыл-агый яамызының ажык медээлеринден алган
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...