Айтырыг шиитпирлеттинген

Тываның Баштыңының даалгазының дугайында социал адыр харыылап турар Чазак Даргазының оралакчызының хүлээлгезин күүседип турар Орлан Сарыглар социал четкиде бодунуң арнында парлаан. Чазак Даргазының оралакчызының баштайгы ужуражылгазы Нина Ендан-Сюрюновна Саая-биле болган. Беш чыл бурунгаар, 2017 чылда, Ак-Довурак хоорайга дерзии өлүрүкчүлерниң холундан ооң оглу, кенни база ийи бичии уйнуктары амы-тынындан чарылган коргунчуг төөгү бүгү Тываны дүвүредипкен турган. Ол өг-бүледен чүгле Нина Ендан-Сюрюновна биле ооң улуг уйнуу Айза дириг арткан. Чоок кижилерин өлүрткен соонда, кырган-авашкылар Кызыл хоорайже көжүп кээрге, хоорайның мэриязы түр када чурттаар оран-саваны аңгылап берген. Ындыг-даа болза кырган-авашкыларның чурттап турган бажыңын бускаш, чурттакчыларны өскээр көжүрген.

Нина Ендан-Сюрюновнага Салчак Тока кудумчузунда 10 дугаар бажыңга түр чурттаар черни берген-даа болза, удавас ол бажыңны база бузар, чурттакчыларны көжүрер төлевилелде хамааржып турар.
“Бо өг-бүлениң төөгүзү бөдүүн эвес. Тываның Баштыңы Владислав Ховалыг Чазактың социал айтырыглар харыылаар адырга аар ажыг-шүжүгге таварышкан өг-бүлелерни чурттаар оран-сава-биле хандырар тодаргай сорулганы салган. Айза өскүс болгаш бажың алыр оочурда турар. Ол ону чоокку үеде алыр” - деп, Орлан Сарыглар демдеглээн.

Владислав Ховалыгның даалгазы-биле Айзага чаагайжыды туттунган квартираны бээр дугайында айтырыгны шиитпирлээрин дүргедеткен.
Кырган-авазының чугаазы-биле Айза күш-ажылга ынак, чуртталгага бурунгаар көрүштүг кылдыр өзүп келген болгаш амгы үеде Ыраккы Чөөн чүктүң федералдыг университединде өөренип турар дугайында өөрүнчүг медээни Нина Ендан-Сюрюновнадан дыңнаанын ол чугаалаан.

“Чуртталгага быжыг туруштуг Айзага, дыштанылга үезинде Тывага келирге-ле катап ужуражыр кылдыр дугуруштувус. Ооң өөредилге талазы-биле практика эрттеринге, келир үеде ажылга тургузарынга дузаны кадар бис. Чүге дизе республикага аныяк кадрлар чугула херек” - деп, Орлан Сарыглар түңнээн.

#Шын # ЧазакДаргазы #ТываЧазак #СоциалАдыр #НинаСаая