Сайлыкмаа Комбу, Тываның Чогаалчылар эвилелиниң даргазы:
– ТР-ниң Баштыңының Айыткалы кончуг улуг ужур-уткалыг, ханы сайгарылгалыг болду. Адыр бүрүзүн Айыткалда киирген-дир. Кайы-даа ажыл-агыйны, яамыны оюп эртпеди. Тодаргай планныг Айыткал салган деп көрүп тур мен. Бо Айыткал 2024 чылдың долу документизи, планы болур-дур. Чогаалчылар эвилелин мында бактаап келген болганымда, культура талазын чугаалаксаар-дыр мен.
Культураның бүгү талазын чугаалады. Салим Сүрүң-оолдуң 100 харлаанын безин, Айыткалда киирген-дир. Культураның алдарлыг улузунуң үлегер-чижээнге аныяктарны өөредип чоруур болгай бис. Культура объектилерин тудуп, чаартырынче кол кичээнгейни салганын, ам-даа ону уламчылаарын чугаалады.
Айыткалдың мурнунда ТШО-нуң дугайында база чугаалады. Бирги одуругда олурар дайынчы, шериг оолдарывыс кайы хире хөй-дүр. Бүгү тыва чоннуң чоргаарланыр чүүлү – 55-ки мото-адыгжы бригадага «Гвардейжи» атты РФ-тиң Президентизиниң тывысканы болгай. Ону база Айыткалга тодарадып чугаалады.
Шак бо Айыткалды бис, хемчегге келген улус, анаа-ла дыңнап эрттирбейн, ажылдап турар адырларывыска чедирип, кол сорулгаларны дамчыдар ужурлуг бис. Келир чылдың кол сорулгаларын айыткан улуг документ-тир.
"Шын" №4 2024 чылдың январь 20