Террорга удур комиссияның (АТК) болгаш Тыва Республиканың оперативтиг штавының пландан дашкаар каттышкан хуралы Тываның Баштыңы Владислав Ховалыгның удуртулгазы-биле болуп эрткен. Айыыл чок чорук болгаш эрге-хоойлу камгалаар органнарның төлээлери, Тываның Чазааның Даргазының оралакчылары, регионнуң одалга-энергетика организацияларының удуртукчуларының киржилгези-биле болган хуралга хөй-ниитиниң айыыл чок чоруунга бооп болгу дег айыыл-халаптарны болгаш амыдырал-хандырылганың чугула объектилерин камгалаар хемчеглерни чугаалашкан.
Владислав Ховалыг хуралды ажыдып тура, бөгүнгү байдал дарый болгаш харыысалгалыг хемчеглерни ап чорударын негеп турарын демдеглээн. Террорга удур комиссия даргазының оралакчызы, Тывада оперативтиг штабтың начальниги, РФ-тиң ФАА ТР-де эргелелиниң начальниги Максим Бережок база Тывада АТК-ның болгаш оперативтиг штабтың кежигүннери – ТР-ниң ИХЯ-ның, Росгвардияның ТР-де эргелели, Россияның ОБЯ ТР-де кол эргелелиниң, ТР-ниң Одалга болгаш энергетика яамызының, ЧЭК-терниң удуртукчулары алдынган немелде хемчеглерниң дугайында илеткеп, айыыл чок чоруктуң хемчеглерин күштелдирериниң санал-оналдарын киирген. Тыва Республика талазы-биле кол федералдыг инспектор Александр Вавилихин элээн каш арга-сүмелерни берген.
Республикада чамдык объектилерни дагын хынаан, чер-черлерде полицияның болгаш күрүне автоинспекциязының постуларын Росгвардия төлээлери-биле быжыглаан. Тываның Баштыңы регионнуң чогуур эрге-чагырга органнары дээди командылалдан даалгаларны ап, чогуур хемчеглерни чорутканын демдеглээн.
«Айыыл чок чорук системазында хөй-ниитиге информация болгаш өске-даа кол угланыышкыннарны хынап, бүгү-ле күштерни белен байдалга турарын база катап контрольдаар херек — деп, Владислав Ховалыг хурал соонда чугаалаан. — Стратегтиг объектилер турар девискээрлерге Росгвардияның, ИХЯ-ның, кожууннарда күрүнениң автоинспекциязының контролюн күштелдирерин, транспорт хынаар пунктулар санын көвүдедирин дугуруштувус».
Частың болгаш Күш-ажыл байырлалдарынга, Ада-чурттуң Улуг дайынынга Тиилелгениң 80 чылынга тураскааткан байырлыг болгаш ниитилел-политиктиг хемчеглерин белеткеп, эрттирер үеде терроржу болгаш экстремисчи болуушкуннарны болдурбазынче угланган немелде хемчеглер көрдүнген. Бо чоокку үеде Тывага чамдык стратегтиг объектилерге оперативтиг албаннарның террорга удур дүрген хөделиишкиннериниң каттышкан өөредилгелери эртер.
ТР-ниң Чазааның парлалга албаны.
«Шын» №21 2025 чылдың июнь 5