Тываның Баштыңы Владислав Ховалыг агаарның температуразы хенертен батканы-биле, амыдырал-хандырылга системаларының, социал объектилерниң үзүктел чок ажылдаарын, складтарда одаар хөмүрнүң бар-чогунче кичээнгейни күштелдирерин чогуур ведомстволарга дааскан. Регионнуң Өөредилге яамызының дужаалынга даянып, назы четпээннерниң айыыл чок чоруун хандырары-биле республикада өөредилге черлери өөреникчилерниң өөрениринге кызыгаарлаашкыннарны тургускан.
«Күштүг сооктар үезинде онза серемчилелдиг болуп, бот-боттарывысты, ылаңгыя чаштар болгаш кырганнарже сагышты салыры чугула. Ажы-төлдүң кеттингенин хайгаарап, ындыг-ла кончуг херек чок болза, соокта даштыгаар үндүрбезин дилээр-дир мен» — деп, Владислав Ховалыг телеграм-каналында бижээн.
Республика Баштыңы күштүг сооктар үезинде өөредилге черлеринче школачыларның баар дүрүмнеринче онза кичээнгейни салырын чаңгыс чер чурттугларындан дилээн. Өөредилге яамызының дужаалы ёзугаар казыыр 40 градус соокта 1-4 класстарның, казыыр 41-42 сооктарда 1-9 класстарның база казыыр 43 болгаш оон-даа соой бээрге, шупту класстарның өөреникчилеринге өөренирин кызыгаарлаан.
Республиканың Баштыңы ол ышкаш күштүг сооктар үезинде айыыл чок чоруктуң дүрүмнерин сагыыр талазы-биле чурттакчы чон ортузунга тайылбыр ажылын күштелдирерин онза байдалдар албаннарынга, яамыларга болгаш ведомстволарга дааскан.
Сооктуң уржуундан оруктарга туманнап, көстүрү 50 метр хире апарып, онза байдалдарны тургузуп болур айыыл бар. Россияның Онза байдалдар яамызының Тыва Республикада кол эргелели ырак оруктан, ылаңгыя дүне чер чоруурундан, ойталаарын чолаачыларга сүмелеп турар.
Республиканың орук-транспорт сайыды Шораан Чыргал-оол орук черлери хондур-хүнзедир ажылдап турарын, чолаачылар болгаш пассажирлер чынныр база чогуур дуза ап болур 11 чылыг черлерни республиканың оруктарында белеткээнин дыңнаткан. Айыылдыг орук участоктарынче онза кичээнгейни салып, чүс хире тускай орук техникалар тайгакка удур элезин-сайны доктаамал төп турар.
Орукчулар орук дүрүмнерин сагыырын, айыылдыг манёврдан ойталаарын, дүрген халдырын кызыгаарлаарын, айыыл чок дистанцияны шыңгыы сагыырын чолаачыларга сүмелээн. Орукче үнер мурнунда, машинаның техниктиг байдалын хынап, оруун болгаш чедип кээр үезин улузунга дыңнадып каар ужурлуг.
Тыва Республиканың Хамааты камгалал болгаш онза байдалдар албаны угарлыг ыштың үнер дөзү үрелик печка системазы бооп болурун сагындырып, эки хынаарын регионнуң чурттакчыларынга сүмелээн. Соок хүннерде эмин эрттир изидир одаан печка өрт айыылын үндүрүп болур. Ынчангаш печка одаарының кол дүрүмнерин база катап сагындырып тур: одап каан печканы хайгаараар, ону көрүп турарын уругларга чагывас, печка чанынга база ооң мурнунда камгалал демиринге кывыычал өске-даа чүүлдер салбас, хөмүр-даш, кокс база газ-биле одаар печкаларга отту кыпсырда, бензин, керосин, дизельдиг азы өске-даа өрттениичел суук бүдүмелдер ажыглавас, печкаларны хөлүн эрттир одавас.
Синоптиктерниң дыңнатканы-биле алырга, дыңзыг сооктар бо неделя төнчүзүнге чедир уламчылаар. Январь 20-де Тывага сооктар уламчылап, чамдык черлерге агаарның температуразы казыыр 45-50 градус чедер. Агаар медээлеринден алырга, неделяның ийиги чартыында чылып эгелээр: субботада азы январь 24-те казыыр 33, а улуг-хүнде 29 градус соок болур.
/ Бистиң корр.
Чурукту интернеттен алган.
“Шын №2 2025 чылдың январь 22