Айыыл чок дыштанылгалар

Декабрь 20-де ада-иелерге “Айыыл чок дыштанылгалар” деп өөредилгени ТР-ниң Өөредилге яамызының баазазынга эрттирген. Аңаа Кызылдың болгаш республиканың бүгү школаларындан ада-иелер видеоконференц-харылзаа таварыштыр киришкеннер. Ол ышкаш ук яамыже республиканың школаларының амыдыралынга үргүлчү идепкейлиг киржип чоруур ада-иелерни чалап, өөрүп четтириишкинниң бижиктерин тывыскан.

“РФ-тиң хоойлулары. Ада-иелерниң хүлээлгелериниң дугайында”, “Өг-бүле кижизидилгезиниң эң-не эки практикалары” деп илеткелдерни ада-иелерниң национал ассоциациязының ТР-де салбырының харыысалгалыг секретары Людмила Спирина кылган. Ол-ла ассоциацияның кежигүнү Виктория Попова кышкы дыштанылга хүннерин организастаарының болгаш айыыл чок дыштанылгаларның бөдүүн дүрүмнериниң дугайында чугаалаан.

Ада-иениң хүлээлгелерин база каксы таныштырган. Бирээде, ада-ие уругнуң салым-чолу дээш харыысалгалыг болур ужурлуг. Ийиде, өг-бүле иштинге уругга хүндүткелди, ооң сонуургалдары биле ажыл-херээ ниити болурун, шыдамык чорукту болгаш камгалалдыг болурун чедип алыры күзенчиг. Ону чедип алырда, уруг-биле кижизидилге ажылын доктаамал чорудар. Эң-не кол чүве – уругга ынак болуру. Ажы-төл-биле чугаалажып турар үеде ада-ие-даа, уруг-даа дең эргелиг болур херек. Кажан арга-сүме берип тургаш, уругнуң бодунуң үзел-бодалын дыңнаарын утпаза чогуур.

Назы четпээн уруглар аразынга кем-херек үүлгедиишкиннерин болдурбазының дугайында ТР-де Россияның ИХЯ-ның, ОШАЧКИ эргелелиниң, ОБЯ-ның ТР-де кол эргелелиниң төлээлери илеткээн.

/ Чыжыргана СААЯ.