«ССБ Кино» компаниязы «Айза 17» деп ажылчын ат-биле уран-чечен фильмни тырттырар деп шиитпирлээн. Кол продюсер Андрей Ляхов баштаан төлээлер Тывада аалдап келген. Республиканың Баштыңы Владислав Ховалыг Наадым байырлалының үезинде бөлүктүң кежигүннери-биле ужурашканының дугайында социал четкилерде бодунуң арнында дыңнаткан.
«Айза 17» деп төлевилелди ажылдап кылып турар продюсерлер болгаш чогаадыкчы бөлүк-биле ужураштым. Бо чылдың март айда Россияның Президентизи-биле ужуражылгага Тывадан тускай шериг операциязының киржикчизи Айдысмаа Монгуштуң чугаалаан төөгүзүнден олар сорук кирген. Ам олар тускай шериг операциязының киржикчизи херээжен кижи дугайында бир дугаар улуг уран-чечен кинону тырттырарын шиитпирлээннер» — деп, Владислав Ховалыг үлешкен.
Бо төөгү Россияда хөй-хөй улусту болгаш бодунуң сагыш-сеткилин дыка шыңгыы тудуп билир Владимир Путинни безин кайгадып, сеткилинге дегген. Март 8 бүдүүзүнде Россияның телевидениезинге көргүскен чурттуң Президентизи-биле ужуражылгага Айдысмаа ол бүгү канчаар болганын чугаалаан. Өөнүң ээзи Омак Дажы 2023 чылдың чайынында тускай шериг операциязынче чоруптарга, удаваанда ол ооң соондан чорупкан. Олар бот-боттарынга 20 км чоок, аңгы-аңгы кезектерге шериг албанын эрттирип турганнар. Айдысмаа — эмчи сестразы, Омак — дайынчы.
2024 чылдың сентябрьда Омак дайынчы даалгадан ээп келбейн барган. Айдысмаа ынак эжиниң өлүмүн билип каан дораан, ооң мага-бодун «куу» девискээрден үндүрер дээш, командиринден чөпшээредип алган. Ол ынчан тулчуушкуннар шыңгыы чоруп турган, ынчалза-даа херээжен кижиниң «кожаадан үнер» тура-соруу Омактың дайынчы эштерин көдүрген. Олар шупту амы-тынын айыылга таварыштырза-даа, эжиниң мага-бодун тыпкаш, чүктеп чорааш, үндүрүп эккелгеннер.
Ындыг төөгүлер мөңгежидеринге төлептиг деп, Президент чугаалаан: «Бо дээрге кандыг-бир уран чүүл ажылдарынга чырыдып, кижилерге тарадып болур, кайгамчык төөгү-дүр». Эрес-дидим уругну дайын шөлүнче ээп келбейн, бодун долузу-биле ажы-төлүнге — уруунга болгаш ийи оглунга бараалгадырын В. Путин дилээн.
Андрей Ляхов Тываның Баштыңынга ол кинону тырттырарынга улуг хемчээлдиг белеткел ажылының дугайында чугаалаан. Кинонуң сценарийи амгы үеде бижиттинип турар, аңаа киржир артистерниң шилилгези болгаш шенелдези эгелээн. Оон аңгыда төлевилелди акша-хөреңги талазы-биле деткиириниң дугайында Кино фондузу-биле чугаалажыышкыннар чоруп турар. Владислав Ховалыг бодунуң талазындан маадырлыг чаңгыс чер чурттугларының дугайында кинонуң үндүрүлгезинге республика база сонуургалдыын, «Айза 17»-ниң тургузукчуларынга бүгү-ле деткимчени көргүзерин аазаан.
«ССБ Кино» дээрге 2017 чылда тургустунган аныяк кино компаниязы. Ол бодун шын болуушкуннарга үндезилеттинген кинолар тургузар компания кылдыр көргүзүп турар. Ол амдыызында беш кинону үндүрген: «Чааскаан» («Одна»), «Дыңнангыр эвес» («Непослушная»), «Шуптузу азы чүү-даа эвес» («Всё или ничего»), «Кольскының Ханызы» («Кольская Сверхглубокая»), «Орус Рейд» («Русский Рейд»). Бо чылдың майда компания Айдысмаа Монгуштуң төөгүзүнге үндезилеп, кино тырттырар планын чарлаан, делегей четкизинге кинонуң баш бурунгаар ады «Айза 17» (ТШО-га эмчиниң тускай шола ады) деп видеороликти тараткан.
Бистиң корр.
Чурукту ТР-ниң Чазааның парлалга албанындан алган.
“Шын” №28 2025 чылдың июль 24