Ак-Довурак хоорайның суг сордурар пунктузунуң септелгези эгелей берген. «Чурттаар оран-сава болгаш чурттаарынга таарымчалыг хоорай хүрээлеңи» национал төлевилелдиң иштинче кирип турар «Арыг суг» федералдыг программаның деткимчези-биле Ак-Довурак хоорайның суг сордурар пунктузун септээр база ук тудугну чаартып тудар ажылдар эгелей берген.
Ук объектиниң септелге ажылдарынче ниитизи-биле 391 сая акшаны чарыгдап тургаш, бо чылдың ноябрь айның төнчүзүнге чедир доозары планда көрдүнген. Септелгениң ийи дугаар чадазын 2025 чылда уламчылаар. «Строй-Экспресс» КХН ук тудугну хүлээнгеш ажылдап кирипкен.
Эрги суг сордурар пункт 1963–1964 чылдарда туттунган турган. Ынчангаш чурттакчы чонунуң саны өзүп-көвүдээн Ак-Довурак хоорайның чонун эрги пункт хандырып күш четпейн барган дээрзин сагындыраал. Чаа туттунуп турар херексел 30 муң чурттакчылыг хоорайны безин арыг суг-биле хандырып күш чедер. Ак-Довурак хоорайның чагырга даргазы Руслан Моңгуштуң медеглээни-биле алырга, бо хүннерде ук хоорайда 12 муң ажыг кижи чурттап турар.
«Арыг суг» федералдыг төлевилел Тываның ийи хоорайында боттанып турар дээрзин сагындыраал. Баштайгы пункт Шагаан-Арыг хоорайда туттунган, а Ак-Довурак ийи дугаар хоорай болуп турары бо.
ТР-ниң Чазааның медээлеринден.
А. ОНДАР белеткээн.
«Шын» №34 2024 чылдың май 8