Тоолчургу чугаа
Шаг-деңгер чаа бүткен турда, шажын-бурган делгереп турда, Ала-Сааскан деп куш хөө-кара турар шагда чүвең иргин.
Ол шагда Хемчикке Алдын-Доос куш чурттап турган чүве-дир. Хемчикти магалыг байлактыг чурт деп көргеш, Алдын-Доос орта мөңгези-биле чурттаар бодаан. Кады чурттаар кадай кылып алыр дээш, Ала-Саасанны Алдын-Доос кудалаарга, ол улуг күзелдии-биле чөпшээрешкен. Алдын-Доос-даа хөө-кара Ала-Сааскан кадайын каастап эгелээн. Ак будук-биле будуп олурда, хенертен думчуунга чүдек баък чыт келген. Ам топтап көөрге, сааскан кадайы мурнунда куш саңы салып алган, ону четтирип орган.
— Пиш! Мындыг чүве чиир сени чоор мен!? — деп, меңнеп алгырыпкаш, Алдын-Доос мурнуу чүкче ужуп чоруй барып-тыр.
Бир эвес Ала-Сааскан ындыг чүдек болбаан болза, Алдын-Доос ам-даа Хемчикке чурттап, чонга магададып турар ийик, а Ала-Сааскан база чон кайгаар чараш кылдыр, чүзүн-баазын будудуп алган турар ийик.
Ала-Сааскан Алдын-Дооска кадай болбаанынга хомудааш, ам-даа чагы бажынга олурупкаш, «халак-халак, халак-халак!» деп хомудап алгырар апарган чүве-дир ийин.
«Мифы, легенды, предания тувинцев» деп номдан алган.
“Шын” №88 2023 чылдың ноябрь 18