Бөгүн, май 18-те, чораан болза, дээди категорияның диктору, хөйге билдингир Сергей Дмитриевич Кондинкин 85 харлаар турган. (1938-1993чч).
Тываның эң баштайгы дикторларының бирээзи, ССРЭ-ниң телевидение болгаш радионуң тергиини Сергей Кондинкин Тюмень облазының Тобольск хоорайынга хөй ажы-төлдүг өг-бүлеге төрүттүнген. Ортумак школага 7 класс дооскан соонда, балык ажыл-агый кооперациязының бухгалтериязынга ажылдаааш, 1954 чылда Тобольск хоорайның культура-чырыдыышкын училищезиниң актёр салбырынче өөренип кирген. Ону дооскаш, Ханты-Мансийск национал округтуң Нахрочинскиниң Культура бажыңының директорунга ажылдаан. 1958 чылда Тобольскиниң, ооң соонда Бийскиниң хөгжүм-шии театрларынга база ажылдаан.
Ынчан Сергей Кондинкинниң артист болурундан аңгыда, ооң үнүнүң өскелерден ылгалдыг, онзагайын улус эскергеш, 1960 чылдың августа айда Бийскиниң телевидениезинче диктор кылдыр чалаан. Улаштыр 1966 чылдың июнь 8-те Тываже чаладып келгеш, июнь 13-те тыва телевидениеге эфирже бир дугаар диктор кылдыр үнген.
“Экии, эргим эштер! Мен силерниң дикторуңар-дыр мен. Мени Сергей Дмитриевич дээр. Хөй чылдарда силер-биле өңнүктер болуп артып каарынга бүзүрээр-дир мен” –деп, эң-не баштайгы эфирин ындыг сөстер-биле ол эгелээш, барык 30 чыл дургузунда үзүктел чок тыва телевидение болгаш радионуң эң-не билдингир диктору болуп ажылдаан.
С.Д.Кондинкин Тыва АССР-ниң алдарлыг артизи деп хүндүлүг аттың эдилекчизи, 1977 чылда “ССРЭ-ниң телевидение болгаш радионуң тергиини” хөрек демдээ-биле шаңнаткан.
Хөйге билдингир дикторну Тывага танывас кижи ынчан турбаан дизе, черле частырыг болбас. Кызылдың кудумчуларынга кылаштап чорда, шупту улус ооң-биле мендилежип эртер турганын хоочуннар эки сактыр.
#СергейКондинкиндиктор