Россияның камгалал сайыды Андрей Белоусов тускай шериг операциязынга шылгараан дайынчыларга «Алдын сылдыс» медальдарын тывыскан. Оларның аразындан Бай-Тайга кожууннуң Кызыл-Даг суурнуң чурттакчызы Найыр Кыргыс — «Кыргыс» деп кыйгы аттыг 20 харлыг тыва дайынчы Россия Федерациязының Маадыры атты алган. Камгалал сайыды маадырларга медаль-биле кады адын сиилбээн чепсекти белекке берген.
Андрей Белоусов шериг албанныгларга бедик шаңналдарны алганы-биле байыр чедирип, даалгаларын үлегерлиг күүсеткени дээш, өөрүп четтиргенин илереткеш, күрүнениң чаагай чоруу дээш моон-даа соңгаар алдар-биле албан-хүлээлгезин күүседиринге бүзүрелин илереткен.
Найыр Кыргыс тускай шериг операциязының даалгазын күүседип тура, хууда эрес-дидим болгаш маадырлыг чоруун көргүзүп, Россияның дээди шаңналынга төлептиг болган. «Восток» бөлүк-биле кады ол украин нацистерниң Запорожье угланыышкынында күштүг бааза кылдыр эде кылган Гуляйполе хоорайже бир дугаарында шургуп кирген. Найыр болгаш ооң кезээниң дайынчылары Гайчур хемни кешкеш, дораан тулчуушкунче киргеннер.
Каржы тулчуушкунга ол бодунуң бөлүүнден аңгыланып балыгланза-даа, дайынчы даалгазын күүседип арткан. Балыын шарып, камгалал турушту ээлеп алгаш, дайзынның дроннарлыг халдаашкынынга үш хонук удур туржуп, дайзынны узуткааш, тылда эштерин камгалаан. Найырның ачызында ооң кезээ дайынчыларының амы-тынын камгалап, камгалал туружун быжыглаан.
Дедирлээр дужаалды алгаш, балыглангаш могап-шылаза-даа, эштеринче ээп келген. Бөлүктүң командылал чери Найырның эрес-дидим маадырлыг чоруун үнелеп, бедик шаңнал тыпсыр дилегни Россияның камгалал сайыдынче киирген. Тываның Баштыңы Владислав Ховалыг база командирлерниң дилээн деткээн.
Ада-чурт камгалакчызының хүнүнүң бүдүүзүнде чурттуң Президентизи Владимир Путин бодунуң чарлыы-биле Найыр Кыргыска Россияның Маадыры деп атты тывыскан. Ол Тывадан Маадырның сылдызын алган тускай шериг операциязының дөрткү киржикчизи болган.
Тываның Баштыңы Владислав Ховалыг бо хүннерде Москвага сургакчылап чорааш, Найыр Кыргыска ужурашкан. Ол Тываның өмүнээзинден маадырга байырын чедирген. «Ол кадыг-дошкун шенелдени эртип, бедик шаңналды алган-даа болза, биче болгаш ажык сеткилдиг хевээр арткан-дыр. Найырдан албан-хүлээлгезиниң болгаш келир үеде сорулгаларының дугайында айтырдым. Мындыг байдалда бистиң оолдарның ишти-хөңнүнүң кайы хире быжыг туруштуун биле бээр сен»— деп, ол бодунуң блогунда бижээн.
Найыр Кыргыс Кызыл-Даг суурга хөй ажы-төлдүг өг-бүлеге төрүттүнүп өскен. Кажан ТШО эгелеп турда, ол чаа-ла 18 харлаан. Техникумче дужаап киргеш, электри энергиязының талазы-биле өөренип турда, шериг албанынче кыйгырткан. Найыр шериглеп тургаш, тускай шериг операциязынга киржир керээни Камгалал яамызы-биле чарар деп шиитпирлээн.
Бистиң корр.
Чурукту Тываның Чазааның парлалга албанындан алган.
“Шын” №7 2026 чылдың февраль 26