Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев биле Федералдыг монополияга удур албанның Новосибирскиде эргелелиниң удуртукчузу Дмитрий Сухоплюев ажыл-албан аайы-биле ужурашкан.
Сибирь регионнарында монополияга удур албанның территориалдыг органнарының технологтуг кожулда, газификация база догазификация болгаш национал төлевилелдер күүселдезиниң садып алыышкын адырларында ажылдарынче онза кичээнгейни углааннар.
Бо хүнде Федералдыг монополияга удур албанның территориалдыг органнары электри энергиязын дамчыдар ачы-дузаже коштунарын контрольдап, монополияга удур хоойлужудулга үрээшкиннерин болдурбас база чайладыр хемчеглерни ап чорудуп турар. 2024 чылдың баштайгы үш кварталында округта анаа монополиялар электроэнергетика адырында технологтуг коштунулга талазы-биле доктааткан чурумну үрээниниң дугайында 4 муң ажыг билдириишкинни киирген, оларның 2 муң ажыынга административтиг херектерни оттурган.
Серышев амыдыралга дыка херек курлавырлар – чырык болгаш газты алырынга хамаатыларның болгаш организацияларның эргелерин камгалаары чугула деп демдеглээн. 9 ай дургузунда округтуң газификация адырында чурум үрээшкиннеринге хамаарыштыр 308 билдириишкинни бүрүткээн, 69 административтиг херекти оттурганын Сухоплюев дыңнаткан.
Монополияга удур хоойлужудулганы эрге-чагырга органнарының сагып турарын контрольдаары, шынчы эвес чижилгелиг факт-барымдааларны үзе шавары, меге дугуржулгаларга удур хемчеглерни алыры — ведомство ажылдакчыларының онза контролюнда. Национал төлевилелдер күүселдезиниң дугайында чугаа болганда, айыттынган адырда бюджет акша-хөреңгизиниң ажыглалын контрольдаар дээштиг хемчеглерни алыр. Национал төлевилелдерниң садыглажылгазын чижилгелиг чорудар ужурлуг, оон башка чурттуң экономиказынга-даа, хамаатыларга-даа манааны үре-түңнелдерни бербейн турар деп, Дмитрий Сухоплюев бодалын чугаалаан.
«Россияның Президентизиниң эгелээни национал сорулгаларны чедип алыр. Нарын байдалдар, даштыкы политиктиг улуг базыышкын турза-даа, күрүне национал төлевилелдер күүселдезинче хөй түңнүг акша-хөреңгини үндүрүп турар. Россияның Федералдыг монополияга удур албанының органнары күрүне болгаш муниципалдыг хереглелди хандырар садыглажылга адырын, монополияга удур хоойлужудулганы, ол ышкаш өртектерни күрүнеден өйлеп-таарыштырар адырда хоойлужудулганы сагаанын контрольдаанындан күрүне Баштыңының салган сорулгаларының күүселдезинде хажыдыышкыннарның саны эвээжээр» – деп, Анатолий Серышев чугаалаан.