Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Новосибирск облазының Күрүнениң күш-ажыл инспекциязының удуртукчузу Вадим Балашов-биле ужурашкаш, хамаатыларның күш-ажылчы эргелерин катап тургузар айтырыгларны чугаалашкан.
Территориалдыг органның удуртукчузу күш-ажыл инспекциязы амгы үеде бооп болур хажыдыышкыннарга удур профилактика ажылынче онза кичээнгейни угландырганын дыңнаткан. Ылаңгыя ажыл берикчилеринге дыңнадыышкыннарны база тайылбырларны берип, баш бурунгаар сагындырыгларны чарлап, профилактиктиг үнүүшкүннерни чорудуп турар. Ынчангаш профилактиктиг үнүүшкүннүң кол сорулгазы – ажыл берикчизинге деткимчени көргүзери болгаш, бир эвес бар болза, хажыдыышкыннарны чайладырының аргаларын кады дилээри. Эрткен чылда 704 профилактиктиг үнүүшкүннерни чоруткан, ол дээрге контроль-хайгаарал ажыл-чорудулгазының санындан барык 8 катап хөй.
Оон аңгыда, күш-ажыл инспекциязы бодунуң ажылында ажылдакчыларның эргезин камгалаарда чаа арга – бооп болур “айыылды” илередип эгелээн. Анализ кылырда дараазында көргүзүглерже кичээнгейни салып турар: ажыл берикчизин дүшкен деп санаарының дугайында билдириишкинни судтуң хүлээп алганы, ажылчыннарның ортумак статистиктиг саны 50 азы оон хөй кижи; бүдүрүлгеге чиик озал-ондактыг таварылгаларның көвүдээни; күш-ажылдың негелдезинге тускай демдекти салырындан ойталааны. 2024 чылда хажыдылга кылып болур ажыл берикчилеринге 56 хыналданы чоруткан, ооң 95 хуузунда чурум хажыдыышкыннары бары бадыткаттынган. Амгы үеде чаа индикаторларны ажылдап кылып турар.
Бүрүн эргелиг төлээниң чугаазы-биле алырга, күш-ажыл инспекциязы хамаатыларга чугула херек хөй янзы ажылдарны чорудуп турар, ылаңгыя аңгы-аңгы адырларга күш-ажыл эргелерин катап тургузуп, шалың төлевириниң өрезин эгидеринге дузалап турар. «Бөгүн тускай шериг операциязының киржикчилери ажылдаар төлептиг олуттарны ап, күш-ажыл адырында оларның эргелери бүрүнү-биле сагыттынып турзун дээш, күрүне эрге-чагырга органнары онза күжениишкиннерни угландырып турар. Ынчангаш ол категорияның хамаатыларының кыйгырыгларынче немелде кичээнгейни салырыңарны дилээр-дир мен» - деп, Анатолий Серышев чугаалаан.
Ужуражылганың база бир темазы – Россияда ажылдап турар даштыкы хамаатыларның аразында күш-ажыл хоойлужудулгазының күүселдези. Вадим Балашов күш-ажыл инспекциязы болгаш Россияның ИХЯ-зының Новосибирск облазының талазы-биле кол эргелели корум-чурум хажыдыышкыннарын илередири-биле кады ажылдап турарын чугаалаан. Оон аңгыда, 2025 чылдың январь 1-ден эгелеп, Россияда хоойлуга удур ажылче кирген таварылгалар демдеглеттинген ажыл берикчилериниң реестри ажылдап эгелээн. Административтиг чурум үрээшкиннериниң дугайында доктаалдың хоойлу езугаар күш киргенинге үндезилээш, реестрже киирер. Ол чүүл даштыкы хамаатыларның аразында чажыт ажылдаары-биле демисежир арганы бээр.
«Күш-ажыл миграциязының адырында Россия Федерациязының күш-ажыл болгаш үндүрүг хоойлужудулгазының хажыдыышкыннарын, «бүдүүлээн схемаларны» болгаш үрелиишкиннерин чайладыр болдурбас дээш, корум-чурум камгалаар, контрольдаар болгаш хайгаараарл органнарының, бизнес-ниитилелдиң төлээлери-биле кады демниг хөделири чугула» - деп, бүрүн эргелиг төлээ демдеглээн. Бүрүн эргелиг төлээниң чугаазы-биле алырга, ажыл берикчилери-биле немелде тайылбыр ажылы бо таварылгада дээштиг угланыышкын болуп турар.