Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Красноярск хоорайга болуп эрткен саң-хөө айыыл чок чоруунуң V делегей чергелиг олимпиадазының организастыг комитединиң хуралынга киришкен. Олимпиаданың түңнел хүнүнде, оргкомитет чаңчыл езугаар чыылган.
Оргкомитет кежигүннери кирген чагыгларны сайгарып көргеш, 2026 чылда делегей чергелиг саң-хөө айыыл чок чоруунуң VI олимпиадазының дараазында түңнел хемчеглери база катап Красноярск хоорайга эртерин шиитпирлээн. Бо хемчегже делегей чергелиг сонуургал улгатканын барымдаалап, даштыкы киржикчилерниң саны элээн көвүдээр ужурлуг деп санаан.
Бүрүн эргелиг төлээ улуг хемчээлдиг, чараш, уттундурбас хемчегни эрттиргени дээш, организакчыларга өөрүп четтиргенин илереткен. Красноярскыда интеллектуалдыг болгаш спортчу маргылдаалар эрттиреринге, чугаа чорударынга, дыштанырынга, онзагай чер-чуртту, ооң чонун, тураскаалдыг черлерин, бот-тускайлаң культуразын, бойдус-чурумалын сонуургап көөрүнге бүгү-ле байдалдар тургустунганын ол демдеглээн.
Дүрген өскерлип турар бо үеде аңгы-аңгы чурттардан чоннар аразында найыралчы харылзааны быжыглаары онза чугула дээрзин Анатолий Серышев онзалап демдеглээн. «Сибирьге бир дугаар эрткен олимпиада 40 чурттан киржикчилерни – школачыларны, студентилерни, чаңгыс үзел-бодалдыг кижилерни, профессионалдарны чыгган. Чанып келгеш, Сибирьже аян-чоруунуң дугайында чылыы-биле сактып, сагыш-сеткилиниң чамдыызы кезээ мөңгеде ында артып каанын чоок кижилеринге чоргаарал-биле чугаалаар дээрзинге бүзүрээр мен» - деп, ол демдеглээн.
Саң-хөө айыыл чок чоруунуң делегей чергелиг олимпиадазы 40 чурттардан, 70 аңгы дылда чугаалажыр 1000 ажыг киржикчини чыгган. Беш хонук дургузунда 100 ажыг янзы-бүрү хемчеглер эрткен. Олимпиаданың түңнел кезээнге 600 кижи киришкен, киржикчилерниң чартык кезии Россияның шупту федералдыг округтарын база чаа регионнарын төлээлээн.