Анатолий Серышев «Орус далай эжиндирикчилериниң оруу-биле» деп делегей долгандыр суг оруу-биле эжиндирер экспедицияның киржикчилери-биле ужурашкан

РФ-тиң Президентизиниң Сибирь федералдыг округта бүрүн эргелиг төлээзи Анатолий Серышев «Орус далай эжиндирикчилериниң оруу-биле» деп делегей долгандыр суг оруу-биле эжиндирер экспедицияның киржикчилеринге ужурашкан. Экспедицияның удуртукчузу Евгений Ковалевский биле эрик черде штабтың баштыңы Юлия Калюжная ужуражылгага киришкен.

Аян-чорукчулар экипажтың кежигүннериниң эжиндирип эрткен оруунуң картазын таныштырган. 2021 чылдың июль 1-де Кронштадтан экспедицияже үнгеш, 2024 чылдың июль 30-де ээп чанып келген. Экипаж үш чыл чартык үе дургузунда 35 муң далай милин эртип, 32 чуртка четкен.

Эртем ниитилелинге чаа харылзааларны тургузуп, аныяктарны каттыштырары – экспедицияның кол сорулгалары турган. Экипаж чүс ажыг катап доктаап, тус черниң чурттакчылары-биле ужуражылганы эрттирип, Россияның база Сибирьниң дугайында чугаалашкан. Ковалевский орус далай эжиндирикчилериниң эртемге киирген улуг үлүг-хуузун, экспедицияның чедиишкиннерин тайылбырлаан.

Юлия Калюжная географияны интерактивтиг хевирге өөредиринче эртемденнерни болгаш школачыларны каттыштырар «Океандан кичээлдер» өөредилге төлевилелин таныштырган. Кичээлдерни билдингир эртемденнер болгаш делегейни долгандыр аян-чорук кылып чоруур аян-чорукчулар эрттирер, а киржикчилер сонуургаан айтырыгларын салып болур.

Эртем-чырыдыышкынныг төлевилелдер чурттар аразының харылзаазын тургузуп, чоннар аразының найыралын быжыглаарынга улуг салдарлыг деп, Анатолий Серышев демдеглээн. “Барыын чүк чурттары Россияны аңгылап, бистиң улуг төөгүвүстүң болгаш культуравыстың дугайында сактыышкыннарны балаар бодаза-даа, олар ону шыдавас. Силер ышкаш чуртунга ханы ынак патриоттар чорда, ол болдунмас» — деп, ол демдеглээн.