Анатолий Серышев ПМЭФ-2025-те “Улуг Сибирь” булуңунуң ажылын ажыткан

Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев XXVIII Санкт-Петербургтуң делегейниң экономиктиг форумунда “Улуг Сибирьниң” булуңун ажыткан. Сибирь регионнарының удуртукчулары база Тываның Баштыңы Владислав Ховалыг ооң ажыдыышкынынга киришкен.

«Ниити үнелиг чүүлдер – хөй талалыг делегейде өзүлдениң үндезини» деп кол тема-биле форум эртип турар. Сибирь федералдыг округтуң регионнары “Улуг Сибирь” булуңу деп чаңгыс шөлде ажылдап турар, ооң ажыдыышкынын Анатолий Серышев чарлаан. "Бо форумда Сибирь федералдыг округтуң субъектилери чаңчыл езугаар чаңгыс шөлдү төлээлеп турар бис. Бо хевир дыка таарымчалыг дээрзин бадыткаан" - деп, бүрүн эргелиг төлээ чугаалаан.

Тываның Баштыңы Владислав Ховалыг бистиң республиканың ол шөлде киржилгезин тайылбырлап тура, ПМЭФ-те Сибирьниң регионнарының чаңгыс демниг ажылы форумнуң кол темазы-биле дүгжүп турарын демдеглээн:

«Коллегаларывыс-биле кады бистиң субъектилеривиске, чаңгыс чер чурттугларывыска чугула ужур-дузалыг дугуржулгаларга атты салып, чугаалажыышкыннарны чорудуп, арга-дуржулганы солчуп турар. Кады ажылдап, бот-боттарывыстан дүрген өөренип, бергелерни ажып эртип турар бис деп Анатолий Анатольевич Серышев демдеглээнин Тываның Баштыңы бодунуң блогунда бижээн. а Сибирьде улуг хемчээлдиг инвестициялар боттаныышкынын булуңда таныштырганын, федералдыг удуртукчулар оларның чугулазын деткээнин айыткан. Сибирьжилерни Россия Федерациязының Президентизиниң чөвүлекчизи Игорь Евгеньевич Левитин уткуп, ылаңгыя Азия болгаш Чөөн чүкче транспорт харылзаазының аргаларын болгаш, оларны чедип алырын онзалап демдеглээн. СФО-нуң ооң мурнунда бүрүн эргелиг төлээзи, амгы үеде Соңгу Осетияның баштыңы Сергей Иванович Меняйло сибирьжилерни сонуургап келген».

400 ажыг дөрбелчин метр шөлдүг, ийи каът черде «Улуг Сибирь» деп булуңну белеткээн. Хуралдаар черлер болгаш дугуржулгаларны чарар өрээлдерден аңгыда, «Сибирь-24» Бүгү-российжи күрүнениң телерадиодамчыдылга компаниязының телеканалының студиязын ажылдаткан, ында Сибирь федералдыг округтуң регионнарының дээди албан-дужаалдыг кижилериниң, ол ышкаш булуңнуң аалчыларының дорт дамчыдылгаларын болгаш интервьюларын организастаар. «Улуг Сибирьниң» культура программазын Томск облазындан «ЮДИ» деп делегей чергелиг танцы бөлүүнүң кежигүннери ажыдар. Бо хүннерде ол булуңга Тыва Республикадан «Он-Кум» деп мода болгаш идик-хептиң үлегерлиг театрының артистери ажылдаар, а хөгжүм үделгезин Тыва Республиканың улустуң хөөмейжизи Игорь Көшкендей организастаар.

Бүрүн эргелиг төлээ Анатолий Серышев 2024 чылда Сибирь булуңунга 80 ажыг дугуржулгалар чардынганын сагындыргаш, чарган дугуржулгаларның санынче эвес, а шынарынче кичээнгейни угландырарын айыткан. «Ат салдынган дугуржулгаларны күүселдеже киирип, бистиң улуг чуртувустуң хамаатылары, Сибирьниң чону ол өскерлиишкиннерни бодунуң амыдыралында караа-биле көрген турарын чедип алыр херек» - деп, бүрүн эргелиг төлээ чугаалаан. Ооң чугаазы-биле алырга, сибирьжилерниң демниг ажылының ачызында эртем-өөредилге, транспорт болгаш инфраструктура объектилерин чаартыр, муң хире социал ужур-уткалыг объектилерни тудуп, эде тудар аргалыг болган.

Бо чылын инвестициялар болгаш кады ажылдажылгага хамаарышкан чүс хире дугуржулгага аттарны салырын «Улуг Сибирь» булуңунга чарлаан. Форумнуң бирги хүнде ажылдаанының түңнелинде, Федералдыг округтуң субъектилери – Тыва Республика, Кемерово, Новосибирск, Томск областар ажыл-чорудулганың аңгы-аңгы адырларында регионнарга ужур-уткалыг төлевилелдерни боттандырарының дугайында дугуржулгаларны чарган.

Организаторларның дыңнатканы-биле алырга, Петербургтуң делегейниң экономиктиг форумунга 140 чурттардан болгаш девискээрлерден төлээлер киржир. 2024 чылда ПМЭФ-ке делегейниң 139 чурттарындан 21,8 муң кижи киришкен. Ниитизи-биле 6,5 триллион хире рубльге муң ажыг дугуржулгалар чардынган.