Россия Федерациязының Президентизиниң Сибирь федералдыг округунда бүрүн эргелиг төлээзи Анатолий Серышев Россия Федерациязының ИХЯ-ның Новосибирск облазының талазы-биле кол эргелелиниң коллегия хуралынга киришкен. Аңаа ведомствонуң 2024 чылда оперативтиг албан ажыл-чорудулгазының түңнелдерин үндүрүп, келир үениң сорулгаларын тодараткан.
Бүрүн эргелиг төлээ ведомствонуң ажылдакчыларынга бедик мергежили болгаш албан-хүлээлгелерин ак сеткилдиг күүседип турары дээш, четтиргенин илереткен. «Эрткен чылын кайы хире үре-түңнелдиг ажылдааныңарны саннар тода көргүзүп турар!» – деп демдеглээн. Эки түңнелдерниң аразындан ниити кем-херек үүлгедиишкининиң деңнелиниң 16 хире хуу, бир дугаарында, аар болгаш онза аар кем-херек үүлгедиишкиннериниң саны эвээжээнин демдеглээн. Информастыг технологиялар ажыглалы-биле холбашкан кем-херек үүлгедиишкиннериниң саны 6,5 хуу эвээжээн, а оларны ажыдары 20 хуу өскен.
Анатолий Серышевтиң чугаазы-биле алырга, Сибирьниң регионнарында социал-политиктиг турум чорук хандыртынган, социал-экономиктиг бурунгаар хөгжүлде чоруп турар. «2024 чылда Россияның Президентизиниң соңгулдалары – кол болуушкун болган, ынчан корум-чурум камгалаар органнар хөй-ниитиниң корум-чурумун тудар болгаш хамаатыларның хостуг бодалын илередириниң сорулгаларын төлептиг камгалаан» — деп, бүрүн эргелиг төлээ онзалап демдеглээн.
Бо чылын ажылдың кол угланыышкыннарының бирээзи – Ада-чурттуң Улуг дайынынга Тиилелгениң 80 чыл оюнга белеткел болур деп, бүрүн эргелиг төлээ айыткан. Полицияның территориалдыг эргелелдериниң 2025 чылда мурнады шиитпирлээр өске сорулгаларында – хөй-ниитиниң айыыл чок чоруун хандырары, ниитилелге националдар, шажыннар аразында болгаш социал дүшкүүрлүг чоруктарның тыптып келирин болдурбазы, национал болгаш шажынчы үндезиннер-биле экстремисчи чүүлдерге удур ажылдаары кирген. Миграцияның хоойлуга удур оруктарын хаарынче онза кичээнгейни угландырар херек. «Бо адырда бар айтырыглар-биле холбаалыг, хөйнү дүвүреткен терроржу болуушкуннарны шупту утпаан бис» — деп, Анатолий Серышев чугаалаан. База бир чугула угланыышкын – наркотиктиг бүдүмелдерни хоойлуга удур тарадып турар каналдарны илередип, оларны хаары.
Бүрүн эргелиг төлээ кадрлар-биле хандырылганы ведомствонуң чедимчелиг ажылынга кол үндезинниң бирээзи деп санап турар. Россия Федерациязының Президентизи Владимир Путин тускай шериг операциязындан чанып келген киржикчилерниң реабилитациязы, социализациязы болгаш тайбың амыдыралга чаңчыктырарынга хамаарышкан айтырыгларже онза кичээнгейни салып турар. «Иштики херектер органнарының системазында кадрлар политиказының айтырыгларын шиитпирлээрде, тускай шериг операциязының хоочуннарын иштики херектер кезектеринче ажылга хаара тударын ажыглаары чугула. «Күрүнениң сонуургалдарын камгалаар дээш амы-тынын болгаш кадыын артынга каггаш, дайынчы хөделиишкиннер зоназынга чораан участок шагдаазының азы патруль-пост ажылдакчызының алдар-ады улуг болуру, маргыш чок» — деп, бүрүн эргелиг төлээ чугаалаан.