Россия Федерациязының Сибирь федералдыг округунуң бүрүн эргелиг төлээзи Анатолий Серышев бөгүн Новосибирск хоорайга Барыын-Сибирь округунуң Арбитраж судунуң даргазы Константин Забоев-биле ужурашкан. Суд эрге-чагырга органнарының мурнунда чугула айтырыгларны сайгарып көргеннер.
Ужуражылганың кол айтырыгларның бирээзи – Барыын-Сибирь суд округунда шүүгүнүң шынарын бедидеринче угланган хемчеглер болган. Суд эрге-чагырга адыры доктаамал сайзырап, чуртта болгаш оон дашкаар болуп турар дүрген өскерлиишкиннерге харыылаар дээш, доктаамал сайзырап турарын бүрүн эргелиг төлээ демдеглээн. «Электроннуг шүүгү информастыг ниитилелдиң аңгылаттынмас кезээ апарган. Информастыг технологияларны ажыглаары шүүгү системазынга хамаатыларның бүзүрелин улгаттырып, ажык-чарлыг чорукту хандырар» – деп, ол санаан.
Константин Забоев техниктиг аргалар дузазы-биле суд хуралдарын видеоконференц-харылзаа база веб-конференция чурумунга эрттирип болур апарганын чугаалаан. Округтуң суду албан езунуң каналын ажылдадып, аңаа Россия Федерациязының Дээди Судунуң онза чугула эрге-хоойлу туружунуң дугайында судтарга дарый дыңнадыры-биле, Россия Федерациязының Дээди Судунуң кассациялыг чадазының шиитпирлерин база Россия Федерациязының Конститусчу Судунуң доктаалдарын неделя санында судьяларның сайгарып турары бижимелдерин, эрге-хоойлу теориязының база суд практиказының аңгы-аңгы темаларынга аудио болгаш видео лекцияларны салып турар.
Алтай Республиканың, Алтай крайның, Кемерово, Новосибирск, Омск, Томск, Тюмень областарның, Ханты-Манси автономнуг округ – Юграның, Ямал-Ненец автономнуг округтуң арбитраж судтарының хүлээп алганы суд актыларының, ол ышкаш ол суд округтарында тургустунган арбитражтыг апеляция судтарның суд актыларның хоойлу-дүрүмнү сагаанын хынаары – Барыын-Сибирь округунуң Арбитраж судунуң кол ажылы. Амгы үеде суд органының штадында 45 судья ажылдап турар, оларның аразында юридиктиг эртемнерниң бир доктору база беш кандидады бар.
Сөөлгү ийи чылда Барыын-Сибирь округунуң Арбитраж суду ажылының шынары-биле Россия Федерациязының округ арбитраж судтарының аразында мурнуку черде. Россия Федерациязының Дээди Суду-биле суд удур-дедир быжыг харылзаалыг ажылдыг. Чөвүлел хуралдарга даянгаш, суд округунда шүүгү чорудуунуң шынарын экижидер талазы-биле чогуур хемчеглерни ап турар.
Россия Федерациязының Президентизи Владимир Путинниң 2024 чылдың декабрьда чарлыы-биле Константин Игоревич Забоевти Барыын-Сибирь округунуң Арбитраж судунуң даргазынга томуйлаан. Ол 30 ажыг чыл стажтыг мергежилдиг юрист, ооң иштинде 24 чыл ажыг үеде судьялап ажылдаан. Ооң мурнунда Константин Забоев Барыын-Сибирь округунуң Арбитраж судунуң даргазының оралакчызынга ажылдап, организацияларга юридиктиг чөвүлекчилеп, Уралдың регионалдыг хоойлужудулга институдунга консультантылап, Свердловск облазының адвокаттар коллегиязынга юристеп, Урал болгаш Сибирь федералдыг округтарның аңгы-аңгы суд чадаларынга албан-дужаалдарны ээлеп чораан.