Кызылдың Хомушку Чүргүй-оол аттыг 16 дугаар лицейиниң 6 «г» клазының ɵɵреникчилери эрткен дыштаныр хүннерде өшкү кыргылдазынга киришкеннер. Олар Сүт-Хөл кожууннуң Ишкин-Аксы деп черде Лидия Олчамаевна болгаш Эзир-оол Ыймажапович Ондарларның кыштаанга ангор өшкү кыргылдазындан аңгыда, көдээ амыдырал-биле таныжып, сонуургааннар. Олар аалдың ээлеринге дузалажып, ыяжын чарып берип, суглап, хоюн кадарып, өзээн малдың ишти-хырнын аштажып, «изиг-хан» кылырынга идепкейлиг киришкеннер.
Аалдын ээлери Кызылдан келген аалчыларынга өшкүнү канчаар кыргыырын көргүзүп, айтып берип, боттарынга кыргытканнар. Уруглар, оолдар ол хүн малчыннарның ажыл-ижин сонуургап, дыка хөй ажыктыг чүүлдерге өөренип алганнар. Бо бүгү ажылдарга 17 өөреникчи киришкен. Олар ол хүн орук ара ыдыктыг Үстүү-Хүрээге барып, чүдүп тейлеп база алганнар.
Чейнеш СЕРЕШ, 6 «г» класстың башкызы.
Авторнуң чуруктары.
«Шын» №18 2025 чылдың май 15