Россияның Аныяктар хүнүнде Чазак Бажыңынга идепкейжи аныяктарны демдеглээн байырлыг хемчег болуп эрткен. Аңаа, чыглып келген аныяктарга, Чазак Даргазының албан-хүлээлгезин тур үеде күүседип турар Владислав Ховалыг байыр чедиргеш, бедик мергежилдиг, бурунгаар чүткүлдүг, быжыг тура-соруктуг, сорулгазын чедип алыр дээш чаартылгалар болгаш бергедээшкиннерден кортпас, чедиишкинниг аныяктарны Тываның Чазаа кезээде деткиир дээрзин дыңнаткан. Оон аңгыда хөй ажы-төлдүг аныяк өг-бүлелерге чуртталга байдалын экижидип алыры-биле сертификаттарны тывыскан.
РФ-тиң Президентизиниң өөрүп четтириишкин бижиин Айдың Кара-Сал биле Айдың Монгушка, РФ-тиң Аныяктар херектериниң талазы-биле федералдыг агентилелден шак-ла ындыг бижиктерни Белек Норбу, Ай-Чечек Кызыл-оол, Айдың Шивидек, Аяс Сат, Ачыты Серенот болгаш Артыш Монгушка тывыскан. Оон аңгыда Барыын-Хемчик кожууннуң олимпийжи курлавырлар спорт школазындан Ай-Белек Монгуш 70 муң рубльдиң, «Авырга» спорт школазының кижизидикчизи, 18 харга чедир элээди спортчулар аразынга болган Европа чемпионадының хүлер медалының эдилекчизи, Тана Тюлюш 80 муң рубльдиң сертификады-биле шаңнатканнар.
Аныяктар хүнүнде чуртталга амыдыралын экижидип алыры-биле Чазак деткимчези болур акша сертификаттарын хөй ажы-төлдүг аныяк өг-бүлелерге тывыскан: Тайгана, Сагхем Хомушкуларга - 559,440 рубльди, Диана, Мерген Буреннерге -945 муң рубльди, Чаяна,Артыш Күжүгеттерниң өг-бүлезинге 1 сая 260 муң рубльдиң сертификадын тывыскан.
Ниитизи-биле бо чылын «Аныяк өг-бүле» деп программаның киржикчилери, 163 өг-бүле, чурттаар оран-сава айтырыын экижидип алыр аргалыг болган.
Чаа тургустунган ТР-ниң Аныяктар херектериниң талазы-биле агентилелдиң директору Эртине Куулар https://vk.com/public201111625?w=wall-201111625_1475 чыглып келген аныяктарга байыр чедиргеш, аныяктар айтырыынче кичээнгейи дээш Тываның Чазаанга четтиргенин илередип, моон-даа соңгаар республиканың хөгжүлдези дээш аныяктарны мөөңнеп база аныяктарның айтырыгларын шиитпирлээри-биле күжениишкинниг ажылдаарын хүлээнген.
Чазактың парлалга албанының чуруктары
#Аныяктархүнү#ТываЧазак#ВадиславХовалыг#Шынсолун#ТMG#Тывамедиахолдинг#Тывамедээ