«Таңды-Уула» чечен чогаал каттыжыышкынның эң-не аныяк, шүлүк чогаадырынга дыка сонуургалдыг кежигүнү Таңды кожууннуң Арыг-Бажы суурда Алик Аракчаа. Бир чылдың иштинде үжен ажыг шүлүктерни ол бижээн. Ооң онзагай бир шүлүү “Чеди-Хаан”.
ЧЕДИ-ХААН
Кежээ дүне айдың дээрде,
Көвей сылдыс аразында
Аңгыландыр көскү чыраан,
Айыраң кылаң Чеди-Хааным!
Чалыы, чараш ынакшааннар
Каткы-хөглүг хөөрежип-ле,
Өрү дээрде Чеди-Хаанче
Өөрүшкүлүг көрзүннер!
Чураан ышкаш көрүптерге,
Чеди сылдыс шуптузу-ла
Тускай хээлиг хымыш дег,
Хуулгаазын Чеди-Хааным!
Каптагайның дүндүүн ээлеп,
Черде биске камгалал бооп,
Караңгының дүмбейинде
Чайынналган Чеди-Хаанывыс!
Алик кежээлерде бажыңындан үнүп келгеш, Чеди-Хаан сылдысче көрүп оргаш, шүлүүн чогааткан чадавас. Шүлүк бижиир кижи ындыг болгай, бир-ле черге чорда, бодалынга кирип, удуп-даа чыдырда, дүжүнге көстүп келген чүвени шүлүк кылдыр чогаадып бижий шааптар. Алик база ындыг кижи болган-дыр.
Сергей ОЮН.
“Шын” №11 2024 чылдың февраль 14