Тываның Чазааның кожууннарның чагырга даргаларының, яамылар, ведомстволар удуртукчуларының киржилгези-биле сентябрь 8-те болган Аппарат хуралынга республиканың неделя дургузунда оперативтиг байдалын чаңгыстап сайгарган.
Онза кичээнгейни сөөлгү үеде көвүдеп эгелээн суг объектилеринге кижилерниң амы-тынындан чарлыр таварылгаларже угландырган. Чүгле чаңгыс неделя дургузунда безин шак ындыг 3 таварылга бүрүткеттинген, оларның ийизи биче хемчээлдиг хемелерниң киржилгези-биле болган. Харыысалгалыг албаннарга болгаш тус чер чагыргаларынга бо талазы-биле профилактиктиг ажылдарны күштелдирерин дааскан.
Оон аңгыда эрткен неделя дургузунда тайгага каттап, мөөгүлеп чорааш, аскан улус дилээринче камгалакчылар үш катап үнген. Регионнуң удуртулгазы өрт айыылын болдурбазы-биле тайга-таскыл, арга-арыг кезиирин хоруп турар чурумну чонга чарлап каан турбуже, кижилер ону херекке албайн, арга-арыгны кезип турары ол бооп турар.
Чазак Даргазының оралакчызының хүлээлгезин күүседип турар Айдыс Сынаа 2025 чылдың 8 айының кем-херек үүлгедиишкиннериниң байдалының дугайында илеткелди кылган. Бүрүткеттинген кем-херек үүлгедиишкиннери айыттынган үе дургузунда 2,8 хууга эвээжээн болуп турар. Кем-херек үүлгедиишкиннери хөй демдеглеттинген кожууннарны адап, удуртукчуларынга байдалдарны кичээнгейлиг сайгарып көргеш, чогуур хемчеглерни алырын, профилактика ажылын күштелдирерин дааскан.
Хуралга чоокшулап келген одалга сезонунуң дугайында база чугаалашкан. Ол Кызылга сентябрь 15-те эгелээр. Оон аңгыда республика девискээринге хөмүр-даш өртээн база сайгарган.
Аппарат хуралының чугаалашкан кол-кол айтырыглары:
Биче хемчээлдиг хемелерниң суг объектилеринге чоруурун кичээнгейге ап, айыыл-халап болдурбазы-биле хыналдаларны чорудар.
8 ай дургузунда Тываның оруктарынга 419 орук озал-ондаа бүрүткеттинген, ооң түңнелинде 75 кижи амы-тынындан чарылган, 612 кижи янзы-бүрү кемдээшкиннерни алган.
Кожууннар чагыргаларынга неделя санында хоойлуга удур арага садып турар улус-биле ажылдап турарының дугайында илеткээрин дааскан.
Кывар-чаар материалдар өртектери сентябрьда турум байдалче кирер деп баш бурунгаар санап турар.
ТР-ниң Чазааның парлалга албанындан алган.
“Шын” №35 2005 чылдың сентябрь 11