Ажылчын неделя чаңчыл ёзугаар регионнуң Чазак бажыңынга Аппарат хуралы-биле эгелээн.
«Тыва — Россияның Президентизиниң онза хыналдазында» — деп, Тываның Баштыңы хуралды эгелээш, РФ-тиң Президентизи-биле ужуражылгазының дугайында дыңнаткаш, эрткен неделяның чидиг айтырыгларын сайгарып, дараазында сорулгаларны тодараткан.
Май 25-те республика девискээринге одалга сезону доозулган. Ынчалза-даа Хову-Аксы сумузунуң чурттакчыларының дилээ-биле одалга сезонун узадыр дугайында айтырыгга шиитпирни хүлээп алган. Электри четкизиниң техниктиг хажыдыышкыннары үрелиишкиннерге чылдагаанны тургускан. Келир одалга сезонунуң белеткелиниң планы тургустунган.
“Бо чылын объектилерниң санын көвүдедирин планнап турар бис, эрткен чылын 27 турган болза, ам 38 болур. Электри шугумунуң 500 хире ыяш чагызын демир-бетон чагылар-биле солуур” – деп, Тываның одаар чүүл болгаш энергетика сайыды Эдуард Куулар илеткээн.
Кызылдың солагай талакы эрикте 8, 9, 11, 12 дугаар дачалар ниитилелдериниң электри четкилерин септеп кылыр. 2025-2026 чылдың кыжында тус черниң чурттакчылары чыккылама соок үеде электри чырыының үрелиишкиннерин шыдажып эртер ужурга таварышкан. Септелгеже 87 сая рубль көрдүнген. Кызылдың Вавилин ээтпээнде электри четкизи база чаарттынар. Оң талакы дачалар ниитилелдеринге чаа трансформаторларны тургузарын регионнуң одаар чүүл болгаш энергетика сайыды бодунуң илеткелинге дыңнаткан.
Энергетикадан аңгыда, тудуг болгаш көдээ ажыл-агый адырларында кидин түлүк ажылдар чоруп турар.
Хуралдың киржикчилери хоойлу-дүрүм камгалакчыларының отчёдун база дыңнаан. Эрткен неделяда хоойлуга удур саарылгадан 3 килограмм хире наркотиктиг бүдүмелдерни хавырган, арага аймаан садып-саарар дүрүмнү хажыткан үш барымдааны илереткен, хоойлуга удур саарылгадан 100 литрден хөй билдинмес бүдүрүлгениң арагазын хавырган. Ада-иезиниң чөпшээрели чокка, бажыңындан үнүп чоруткан беш таварылга демдеглеттинген, назы четпээннерни шуптузун тыпкаш хүлээткен.
“Чеден ийи элээдини, ооң 17-зин дүнеки үеде хөй-ниити черлеринге хоойлу ёзугаар төлээзи чокка турганы дээш, иштики херектер килдизинге эккелген. Социал албан черлеринге 20 назы четпээн уругларны хүлээткен, оларның дөртүн уруглар эмнелгезинче, 16-зын хоргадалче чыттырган”– деп, Тываның иштики херектер сайыды Юрий Завьялов илеткээн.
Айыыл-халап болган черге бир кижи амы-тынындан чарылган. Ооң чылдагааны — ажылдадып кааш турган трактор башкарылга чокка хенертен шимчей бергениниң түңнелинде чолаачыже хөме халдып келген. Республиканың оруктарынга бүрүткеттинген ийи озал-ондактың түңнелинде дөрт кижи янзы-бүрү кемдээшкиннерни алган.
Бистиң корр.
Чурукту Тыва Чазактың парлалга албанындан алган.
“Шын” №20 2026 чылдың май 28
"Шын" солуннуң МАХ-каналынга каттыжыңар: max.ru/join/egenQ...