Истелгени ханыладыр чорудар
Аар кем-херек үүлгедиишкиннериниң хөй кезиин хамаатылар эзирик үүлгедип турарлар. Аңаа салдарлыг болган багай чылдагааннарның бирээзи – арага аймаан чажырып садып турар кижилерде.
Араганы республикаже чажыды-биле киир сөөртүп, чажырып садар чорукту чок кылыр талазы-биле хемчеглерни Тыва Республиканың прокуратура болгаш хоойлу-дүрүм камгалалының органнары кады чорудуп турар. Ооң түңнелинде чүгле 2022 чылдың баштайгы 6 айларында аар кем-херектерни эзирик үүлгедир чоруктар 5 хууга кызырылган.
Тыва биле Хакасияның ийи чурттакчылары 2021 чылда хөй хемчээлдиг арага аймаа садып алгаш, республикаже чажыды-биле киир сөөртүп, Кызыл хоорайда боттарының гаражтарынга болгаш машиналарынга шыгжап турганнар. Оларның арага-дары чажырып садар үүлгедиин иштики херектер албанының ажылдакчылары илередип тыпкаш, садыг марказы чок 1 муң ажыг шилдерде, 314 канистрлерде ниити хемчээли 1,7 муң литр эзиртир суксун аймаан хураап алган.
Тыва биле Хакасия ийи кожа девискээрлерниң бо чурттакчыларынга хамаарыштыр истелге херээн дооскан. Сүлчээлежип алгаш, араганы улуг хемчээлге садып турганынга буруудаткан хамаатыларга хамаарыштыр истелге херээниң материалдарын республиканың прокуратуразы сайгарып көрүп, бадылааш, ону судче дамчыткан.
Араганы чажырып садар чорук-биле демиселди улам күштелдирер дээш, араганы чажырып сатканының уржуктарын ханыладыр истээр сорулганы республиканың прокуратуразы истелге органнарының мурнунга тургускан. Бир эвес аар кем-херек үүлгедиин эзирик кижи үүлгеткен болза, ол кижи араганы каяа ишкенин, ол араганы кайын садып алганын истеп тодарадыр. Араганы чажырып садып турар черден азы кижилерден садып алганы билдинер болза, араганы чажырып саткан хамаатыларга хамаарыштыр истелге херээн аңгы оттурар.
Игорь Оюн,
Тыва Республиканың прокурорунуң массалыг информация чепсектери болгаш хөй-ниити-биле кады ажылдажылга талазы-биле улуг дузалакчызы.