Ээлеп орар албан-дужаалын ажыглап, ажылдакчылардан хээли алыр чоруктар истелгези республиканың арга-арыг адырында адакталган. Ол херектерни судче дамчыдып берип турар.
Тыва Республиканың арга-арыг ажыл-агый болгаш бойдус курлавырлар ажыглалының сайыды бодунуң албан-дужаалын ажыглап, улуг хемчээлдиг хээлилер алганының дугайында Россия Федерациязының Истелге комитединиң Тыва Республика талазы-биле Истелге эргелелиниң медээлери массалыг информация чепсектеринге 2023 чылдың төнчүзүнде көстүп келгилээн.
2022 чылдың май айда автономнуг албан чериниң ажылдакчыларындан 400 муң рубль хээлини арга-арыг ажыл-агыйы болгаш бойдус курлавырлар ажыглалының сайыды алганы билдинген. Улуг хемчээлдиг хээлини алган сайыт «Авиалесоохрана» автономнуг албан чериниң ажыл-чорудулгазында хоойлу-дүрүмге дүүшпес чүүлдерни кырындан чажырар ужурлуг турган. Бо кем-херекти РФ-тиң Айыыл чок чоруктуң федералдыг албанының Тыва Республика талазы-биле эргелелиниң оперативтиг ажылдакчылары илереткенин ол ажык медээлерде дыңнаткан.
Республиканың арга-арыг ажыл-агыйы болгаш бойдус курлавырлар ажыглалының сайыды албан-дужаалды ээлеп турган хамаатыга Тываның «Авиалесоохрана» автономнуг албан чериниң ийи ажылдакчызы хээли акшаны дамчыдып бергенин регионнуң прокуратуразының парлалга албаны массалыг информация чепсектеринге чырыткан. Ол медээ ёзугаар алырга, 2021 чылдың декабрь айда сайытка 500 муң рубльди, 2022 чылдың март – сентябрь айларда 1,2 сая рубльди бир кижи дамчыштыр үш кезектеп «Авиалесоохрана» автономнуг албан чериниң ажылдакчылары дамчыдып бергени истелге үезинде илерээн.
Арга-арыг ажыл-агыйы болгаш бойдус курлавырлар ажыглалының сайыды албан-дужаалды ээлеп турган хамаатыга акша хээлизин дамчыдып бээринге киржилгези дээш «Авиалесоохрана» автономнуг албан чериниң ажыл-агый эргелекчизинге ажылдап турган хамааты херекке онаашкан. 2022 чылдың март – сентябрь айларда 1,2 сая рубльди сайытка дамчыдып берген кижи ол болган.
/ ТР-ниң прокуратуразының ажык медээлеринден.