Бо хүннерде Тываның Баштыңы Владислав Ховалыг Москвада ажыл-агыйжы сургакчылаашкында.
Декабрь 13-те регионнуң Баштыңы Россияның арга-арыг ажыл-агыйының удуртукчузу Иван Советников-биле ужурашкаш, Тываның арга-арыг ажыл-агыйының ниити байдалын болгаш өрт айыылының сезонунуң түңнелдериниң дугайында чугаалашкан. 2024 чылда Тываның девискээринге ниитизи-биле 44 га черге 207 арга-арыг өрттери бүрүткеттинген. Ужуражылга үезинде арга-арыг өрттериниң кол чылдагааннарының болгаш ону өжүрериниң дугайында база чугаа болган. Тываның девискээринге болган өрттерниң чартыы 3 хонганда-ла узуткаттынып турган.
Тываның турар чери онзагай – дагларлыг болгаш ыйгылааштарлыг. Даглыг черлер девискээрниң 82 хире хуузун ээлеп турар. Чедери берге черлерге өрттерни илередип тып турар.
Тыва Республиканың Баштыңы Владислав Ховалыг арга-арыг ажыл-агыйынга хамаарышкан айтырыгларга база Тываның социал-экономиктиг хөгжүлдезинге деткимчези болгаш кады ажылдажылгазы дээш Иван Васильевичиге өөрүп четтиргенин илереткен.
«Россияның арга-арыг ажыл-агыйының удуртукчузунуң болгаш чурттуң өске-даа регионнарындан дуза кадып келген специалистерниң ачызында улуг өрттерни өжүрер аргалыг болдувус. Ам Россияның арга-арыг ажыл-агыйы дроннарны ажыглаар дугайында ажылдарны чорудуп эгелээн. Ук адырга ол кончуг улуг деткимче-дир.
Арга-арыгны өрттен камгалаарынга хамаарыштыр саң-хөөнү улгаттырар дугайында айтырыгны көдүрдүвүс. Парашют-десант албанының ажылдакчыларын көвүдедир дугайында документини кылып белеткээн бис. Ол ажыл арга-арыгга өрт айыылын эвээжедир деп санап турар бис» – деп, В. Ховалыг социал четкиде бодунуң арнынга демдеглээн.
Бистиң корр.
Чуруктарны интернеттен хоолгалаан.
“Шын” №96 2024 чылдың декабрь 14