2024 чылдың сентябрь 13-те эртенгиниң 8 шак 45 минута турда Республиканың диспетчер албанының берген медээзи-биле алырга, Тываның девискээринде 6 арга-арыг өрдү ниитизи-биле 19048 га черде кыппышаан.
Кызылдың арга-арыг даамылында 260 га черге арга-арыг өрдүн чаңгыс хонуктуң дургузунда өжүрген. Таңды, Каа-Хем болгаш Кызыл кожууннарның девискээринде арга-арыг ам-даа өрттенип турар.
246 кижи болгаш 11 техника өрт өжүрер ажылда хаара туттунган. Красноярск крайның, Новосибирск, Иркутск, Томск олбластарының болгаш Бурят болгаш Хакас республикаларның өртчүлери Тываның өртчүлери-биле деңге ажылдап турар.
Сентябрь 13-түң дүнезинде болгаш эртенги шакта республика девискээри туманныг болганы-биле, өртке хамаарыштыр айыыл ам-даа уламчылавышаан. Арга-арыг өрдүнүң айыылы диргелип келгени-биле 2024 чылдың август 17-ден тура арга-арыг кирерин бүрүнү-биле хораан дээрзин сагындыраал.
Бистиң корр.
“Шын” №70 2024 чылдың сентябрь 14