Тывада чурттакчылыг черлер чоогунга адыглар көстүп келир таварылгалар саны көвүдээн. Эрткен неделяда Кызыл биле Сүт-Хөл кожууннарда сөөлгү таварылгалар илереттинген. Республиканың Баштыңы Владислав Ховалыг регионнуң чурттакчыларынга тайгаже чааскаан үнеринден ойталаарын база аңаа чорааш, серемчилелин салбазын сүмелээн.
Тываның Аңныыр күрүне комитединиң ажылдакчылары чурттакчылыг черлерже кирген адыгларны чок кылганын дыңнаткан. Ведомствонуң удуртукчузу Артыш Салчактың дыңнатканы-биле алырга, эрткен неделяда дөрт адыгны аткан. Адыглар санын таарыштырар дээш, шупту муниципалдыг тургузугларда бригадаларны тургузуп ажылдаткан.
Тайгада кат-чимистиң болгаш тооруктуң чегей үнгени-биле аштаан арааттаннар чем дилеп, суурларже кирип турар дээрзин специалистер дыңнаткан.
Адыглар ижээннээринге белеткенип, семирип алыры-биле сентябрь, октябрьда ам-даа димзенип кылаштаар деп Владислав Ховалыг МАХ-та бодунуң каналынга сагындырган. Тургустунган айыылды барымдаалап, кижилер-биле озал-ондактарны болдурбас дээш, республиканың Аңныыр күрүне комитединге комплекстиг хемчеглерни ажылдап кылырын, а кожуун даргалары хөй-ниитиге дыңнадыг кампанияларын организастаарын дааскан.
«Регионнуң чурттакчыларынга болгаш аалчыларга тайгаже чааскаан үнмезин сүмелээр-дир бис. Каттап тооруктаарда, бөлүк-бөлүк болуп алгаш чорааны дээре. Харылзажыр телефонун кезээде ап чорууру күзенчиг. Арга-арыгже кирер мурнунда, планнап алганы маршрудун бодунуң кожуунунуң чагыргазынга дыңнадыр. Бодуңарны камнап, кончуг серемчилелдиг болуңар, чаңгыс чер чурттуглар»— деп, В. Ховалыг кыйгырган.
Бистиң корр.
Чурукту ТР-ниң Чазааның парлалга албанындан алган.
«Шын» №33 2026 чылдың август 27
"Шын" солуннуң МАХ-каналынга каттыжыңар: max.ru/channel_shyn