Арга-дуржулгазын солушканнар

Ийи дагның бажы чоок-даа бол, дээшпес,
Ийи кижиниң аразы ырак-даа бол, дужа бээр.

Мөңгүн-Тайга биле Бай-Тайганың аразы ырак-даа эвес, харажып алган турар. Сыын-Баштыг биле Саадак арттары оларның аразында турар. Ынчангаш дорт орук чогундан Чадаана таварты аргыжып турарывыс билдингир.

Февральдың кончуг соок хүннериниң бирээзи, Бай-Тайга кожууннуң ном саңнарының кызымак ажылдакчылары дуржулга солчуру-биле, Мөңгүн-Тайганың О.Ч. Чанчы-Хөө аттыг уругларның чаарттынган ном саңы болгаш С.Ч. Самбуу аттыг ном саңнарынга кээп арга-дуржулгазын солушканнар. Ном саңнарының хоочуну кижи болганымда сонуургап кээп көөр эргелиг болдум. Бай-Тайга кожууннуң Кызыл-Дагда база чаа хевирниң ном саңы барын чүгле телевизордан көргенден башка барып четпээннер хөй болду.

Бо солун ужуражылганы дыңнап оргаш, бо адырда ажылдап турар аныяк-даа, элээн хоочун-даа ажылдакчыларның ажылынга кызымаан, шудургузун кижи кайгап ханмас. Ужуражылга үезинде кымны ол угланыышкын-биле канчаар ажылдап турарын бот-боттарының мурнун былаажып айтыржып-ла турдулар. О.Ч. Чанчы-Хөө аттыг уругларның ном саңы чаа дериг-херекселдер-биле канчаар хандыртынганын удуртукчузу Аяна Седейевна Иргит таныштырып, чугаалап, чагыдылга болгаш чаа номнар-биле хандырып турары эки деп килдистиң бухгалтер, экономистерге четтиргенин илередип турду. Кызыл-Дагның көдээ ном саңын база ынчаар чаартып тургускан. Ол чаартылгалар талазы-биле боттарының тургузуун болгаш ажыл-ижин тускай самбырага көргүзүп, тайылбырлажып шаг болдулар. Ында чүнү чок дээрил: уруглар ойнаар тускай өрээл, чуруттунар элезинниг столдар, уругларга дирлип кээр чуруктарлыг номнар, бойдусче үнгеш, ажыглаар колонка дээш бо кижиниң билбес чүвези хөй болду.

Бай-Тайга кожууннуң бо кожуунга көөрде, көдээ ном саңнары хөй болганындан, төп ном саңында ажылдакчыларының саны хөй улус болду. Колдуунда чаа ажыттынып турар национал төлевилелдер-биле канчаар ажылдап турарын сайгаржып чугаалажып, дыка-ла үр ажылдадылар.

Орук-суур ырак болганындан кожуунувусче телевидение, корреспондент дээн чижектиглер ховар келгилээр болганда, бо ийи кожуун аразынга библиотекарьлар аразынга ужуражылга дыка-ла дээштиг деп түңнелге кээп, моон-даа соңгаар культура албан черлеринге мындыг чижектиг ажылдарны нептередири күзенчиг.

Надежда ОНДАР, библиотека адырының хоочуну.
Мөңгүн-Тайга кожуун.

“Шын” №19 2024 чылдың март 13