Декабрь 19-та Улусчу чогаадылга бажыңынга ТШО киржикчилеринге ачы-дуза чедирилгезиниң концерди болган.
Ооң кол организакчылары Тываның Чазаа, ТР-ниң Культура, Көдээ ажыл-агый яамылары болган. Аңаа республиканың алдар-аттыг артистери киришкен.
“Бо үеде ТШО-да бистиң оолдарга техниктиг дериг-херекселдер чугула херек болуп турар. Ынчангаш республиканың көскү артистеринден шак мындыг деткимчеден көргүзерин дилээн бис. Бо ачы-дуза концердинден кирген хөреңги-биле ТШО-да дайынчыларның чагаан чүүлдерин — техниктиг дериг-херекселдерни Москвадан саткаш, чедирер. Чаа чыл уткуштур чылыг хептер, буржуйка-печкалар, эм-дом аймаа дээш өске-даа чондан чыглып келген ачы-дуза чедирилгезин, ооң иштинде республиканың муңчу малчыннарының чыып бергени 3 тонна эът аймаан декабрь 21-де чорудар бис. Декабрь 25-те чондан чыглып келген автомашиналарны чорудар бис. ТШО-га ачы-дуза чедирилгези уламчылап турар. Малчыннар мал-маган, эът-чемин ам-даа дузаламчыга эккеп берип турарлар. Ээлчеглиг чүъктү январь айда чорудар бис” — деп, Улусчу фронтунуң Тывада күүскомунуң даргазы Саима Далчин чугаалаан.
Концерт үезинде ТР-ниң Чазак Даргазының оралакчызы Тимур Куулар чыылганнарга четтиргенин илереткеш, ТШО-да бистиң дайынчыларывыска төрээн чуртундан мындыг дуза канчаар-даа аажок чугула дээрзин чугаалаан.
Херек сөстерни чугаалап тургаш, залга чыглып келген улустуң сагыш-сеткилинге дээштиг кылдыр, Тываның алдарлыг артизи Галина Сюрюннуң өске концерттерден ылгалдыг башкарып, номер бүрүзүнге ханы утка киирип эрттиргенин демдеглевес арга чок.
“Болган ачы-дуза чедирилгезиниң концертинче саттынган билеттерден 500 муң рубльга немей 100 муң рубльди ТР-ниң алдарлыг артизи, режиссер Орлан Монгуш, ыраажы Артыш Сагаан 20 муң рубльди, Тываның көдээ ажыл-агый сайыдындан халашкан Алдай-Мерген Ховалыг 30 муң рубльди берген. Ынчалдыр ниити чыглы берген акшаның түңү 650 муң рубль болуп турар. Ол ышкаш болган концертке республиканың муңчу малчыннары, көдээ ажыл-агый бүдүрүлгелериниң удуртукчулары деткикчилеп келгени онзагай болду.
ТШО киржикчилеринге дуза кадыксаан эриг баарлыг бүгү кижилерге, зал долдур чыглып келген көрүкчүге четтиргенивис илередип тур бис" – деп, Улусчу фронтунуң Тывада күүскомунуң даргазының оралакчызы Галина Сюрюн чугаалаан.
Бо удаада Чаа чыл уткуштур ТШО-да оолдарже эът-чем талазы-биле деткимчени көргүскен малчыннар: “Ырлыг-Булак” КХН-ниң чиңгине директору Мира Кыргыс 10 баш шээр мал болгаш 1 аътты, “Малчын” күрүнениң унитарлыг бүдүрүлгези 10 баш шээр мал, 3 сарлык болгаш 2 аътты, “Адарган” МУБ 5 баш шээр малды, “Торгалыг” МУБ база 5 шээр малды, Чеди-Хөл, Чөөн-Хемчик кожууннарның чагырга черлери 10–10 баш шээр малды берген.
Оон аңгыда, октябрь айда В. Көк-оол аттыг Национал театрга “Чүгленген күзел” деп шииден кирген орулганы база ачы-дуза чедирилгезинче киириштирген. Ынчан чыглы берген акша-биле дроннарга удур дериг-херекселдерни саткан.
К.МОНГУШ.
Буян ООРЖАКТЫҢ тырттырган чуруктары.
“Шын” №98 2023 чылдың декабрь 23