Июль 31-де Эрзин кожууннуң Мөренге ТШО-нуң маадыры, улуг лейтенант, шаап халдаар взводунуң командири Артём Откунович Сараагайның чырык адынга тураскаалды, эрес-маадырлыг чорукту алдаржыткан дайынчы ёзулал-биле ажыткан.
Байырлыг ажыдыышкынга Тыва Республиканың Дээди Хуралының (парламентизиниң) айыыл чок чорук, хоойлу болгаш корум-чурум талазы-биле комитет даргазы, маадырныӊ дайынчы эжи Аяс Санчат, Эрзин кожууннуң шериг комиссары, майор Эдуард Борисов, Артём Сараагайның ажылдап чорааны ТР-ниң ИХЯ-ның “Таңды” полиция кезээниң хоочуннары, «Ада-чурт камгалакчылары» күрүне фондузунуң тус черде төлээзи Диана Чалдыг, оолдуӊ школага башкызы Чечек Күр база эш-өөрү сөс ап, чылыг сактыышкыннарны кылганнар.
Артёмнуң ачазы уран холдуг тудугжу өгбе, Мөрен суурнуң хүндүлүг хамаатызы Откун Кыргысович Сараагай база тураскаалдың ажыдыышкынынга киришкен. Маадырның өөнүң ишти Алёна Сараагай сактыышкын ёзулалының киржикчилеринге өг-бүлени деткип чедип келгени дээш, чылыг-чымчак сөстер-биле өөрүп четтириишкинни илереткен.
Тыва Республиканыӊ уран чүүлүнүӊ алдарлыг ажылдакчызы Александр Ойдуптуң сиилбип шуткааны Артём Сараагайныӊ чаныш-сыныш чок овур-сынын Мөрен суурнуң төвүнде 2013 чылда тургузуп ажыткан Ада-чурттуӊ Улуг дайынының хоочуну Данил Чалзыраевич Дажымбаның тураскаалының база амгы үениӊ маадырлары, ТШО-га мөчээн оолдарныӊ сактыышкын самбыразыныӊ чанынга сумунуӊ бүгү чону демнежип тургускан.
Артём Сараагайның амыдырал-чуртталгазы, албан-ажылы, шынап-ла, үлегерлиг. Ол Соңгу Кавказка шериг хөделиишкиннериниң хоочуну, Иштики херектер яамызынга хөй чылдарда албан-хүлээлгезин эрттирип тургаш, хүндүлүг дыштанылгаже үнген. Ооң мергежилинге шынчызы база чонунга эвилеӊ чоруу бедик үнелелди алган: улуг лейтенант Сараагай «Улусчу участок төлээзи» деп хүндүлүг атты чаалап алган болгаш төлептиг эдилеп чораан. ТШО-га киирген үлүг-хуузу дээш шериг командир Артём Сараагайга Россия Федерациязының Президентизиниң чарлыы-биле «Эрес-дидим чорук орденин» мөчээн соонда тывыскан.
Байырлыг митингини Тыва Республиканың алдарлыг артизи Омак Натпит-оол башкарыкчылап эрттирген. Тураскаалдыг ёзулал Тываның алдарлыг артизи Херел Мекпер-оолдуң болгаш ховар хөгжүмчү Адыган Айыжы баштаан «Диӊмит» бөлүүнүң күүселдези-биле онзагай уткалыг болган. Салым-чаяанныгларның төрээн чер-чурт, дайынчы акы-дуӊмалышкы база эп-найыралды алгаан ырлары аалчы бүрүзүнге маадырлыг чоруктуң үнезин, хүлээлгеге бердингенин, чанып келбээн кижилерниң мөӊге тураскаалын кадагалап арттырарының чугулазын сагындырып турган.
/ Чаяна ЧЫКАЙ, Россияныӊ Журналистер эвилелиниӊ кежигүнү
Авторнуӊ тырттырган чуруу.
“Шын” №31 2026 чылдың август 13
"Шын" солуннуң МАХ-каналынга каттыжыңар: max.ru/channel_shyn