Ары азырап өстүрүп турар улуска Казахстандан, Узбекистандан «арылыг пакет» садып алыры хоруглуг дээрзин Россияныӊ Көдээ ажыл-агый хайгааралы дыӊнадып турар.
«Ары пакеди» дээрге 1,5–2 кил хире деӊзилиг тускай хааржактыг ары өө болур. Үстүнде айыткан чурттар Россияже ук барааннарны эккеп тургаш, чогуур негелделерни үргүлчү хажыдып турган. Айыылдыг аарыглыг арыларны эккеп болурунуӊ айыылы бар. Ынчангаш Россияже шак ол даштыкы чурттардан арылыг продукция киирери хоруглуг.
Интернеттен азы улус холундан «ары өө» садып алырда, ветеринария талазы-биле лабораторлуг шинчилелдерни, чогуур хыналдаларны эрткенин бадыткаан документилерин айтырып алыр.
Республикада ары азырап өстүрүп турар улус каражага таварышпазын дээш, шак ол ветеринарлыг негелдени сагыырын Тыва, Хакас республикаларда болгаш Кемерово облазында – Кузбасста Көдээ ажыл-агый хайгааралыныӊ эргелели сүмелеп турар.
/ Р. ДЕМЧИК белеткээн.