Тываның волонтерлары камгаланыр четкилер аргыырын уламчылап турар. Республикада ниитизи-биле 20 ажыг шак ындыг пункт бар. Оларның бирээзи Таңды кожууннуң Арыг-Бажында.
“Чүректиң кыйгызындан” деп волонтерлар төвү эрткен чылын ноябрь айда ажыттынгаш, амга чедир идепкейлиг ажылдавышаан. Ында Мөңгүн волонтерлар болгаш Херээженнер чөвүлели демнежип алган блиндажтар болгаш шериг техника чажырар камгалал четкилерни идепкейлии-биле аргып турарлар.
“Бистиң суурувустан тускай шериг операциязынче 8 оол чорупкан. Бис оларга шыдаар шаавыс-биле чүнүң-биле-даа болза дузалажыр деп шиитпирлээш, баштай гуманитарлыг дуза чыггаш чорудуп турган бис. Ооң соонда дрон садып бээр дээш, акша чыып эгелээн бис. Ооң өртээ хөлүн эрттир аар болган. Ынчангаш ол чыгдынган акша-хөреңгивис-биле чажыртынар четкилер аргыыр материалдар садып алдывыс. Ону кылырынга бисти республиканың Улусчу фронтузу өөредип каан” – деп, волонтержу төптүң кежигүнү Жанна Чамбал чугаалаан.
Волонтерлар төвү даң бажындан кежээге чедир ажылдап турар. Бир хүн гуманитарлыг чүъктү чорудар мурнунда чаңгыс хүн иштинде четкини аргып доозупканнар. Ол волонтерларның база бир чедиишкини болган. Бо үе дургузунда олар ТШО-же ниитизи-биле 40 четкини чоруткан. Ам-даа 2 четкини олар немей аргып турарлар.
Шак ындыг чаштынарынга херектиг четкилерни аргыыры ындыг-ла нарын эвес. Ынчалза-даа ол бодунуу-биле тускай дүрүмнерлиг болгаш негелделерлиг. Кескиндилерни чогуур аайы-биле кескеш, хендирге чурум ёзугаар баглаар.
Камгаланыр четкилерни аргыыры эгезинде черле берге, оон чоорту катап-катап өрүп тургаш өөренип алыр дээрзин волонтерлар эскерген. Хоочуннар чеже-даа тылда болза, дайынчыларны деткип, болдунар-ла чүүлдү кылып турарын демдеглээннер. Чаңгыс чер чурттугларының Ада-чурт камгалалынче киирип турар үлүг-хуузун демдеглевишаан, оларга чоргаарланып чоруурун илереткеннер.
Чыжыргана СААЯ.
Ада Тюлюштуң тырттырган чуруу.
“Шын” №67 2024 чылдың сентябрь 4